ឯកឧត្ដម សួស ប្រាថ្នា៖ ចាប់ពីត្រីមាសទី៤ ឆ្នាំ២០១៨ រហូតដល់ដំណាច់ឆ្នាំ២០២៣ អង្គភាពច្រកចេញចូលតែមួយរាជធានី ខេត្ត បានផ្តល់សេវារដ្ឋបាលជូនពលរដ្ឋជាង ៣,២លានសេវា ទទួលបានចំណូលជាង ១១៣លានដុល្លារ

ភ្នំពេញ៖ ឯកឧត្តម សួស ប្រាថ្នា អគ្គនាយក នៃអគ្គនាយកដ្ឋានរដ្ឋបាល ក្រសួងមហាផ្ទៃ បានថ្លែងឲ្យដឹងថា គិតចាប់ពីត្រីមាសទី៤ ឆ្នាំ២០១៨ រហូតដល់ដំណាច់ឆ្នាំ២០២៣ អង្គភាពច្រកចេញចូលតែមួយរាជធានី ខេត្ត បានផ្តល់សេវា រដ្ឋបាលជូនប្រជាពលរដ្ឋ ចំនួន ៣.២២៥.២៦៧សេវា និងទទួលបានចំណូលសរុបចំនួន ៤៥៤.៤៩៥.៨៩៨.៥៥១រៀល ស្មើនឹង ១១៣.៦២៣.៩៧៤ដុល្លារអាមេរិក ។

ក្នុងសន្និសីទសារព័ត៌មាន រៀបចំដោយក្រុមអ្នកនាំពាក្យក្រសួងមហាផ្ទៃ លើប្រធានបទប្រធានបទ «ការផ្តល់សេវាតាមយន្តការច្រកចេញចូលតែមួយ» កាលពីថ្ងៃទី១៤ ខែមិថុនា ឆ្នាំ២០២៤ ឯកឧត្តម សួស ប្រាថ្នា បញ្ជាក់បន្ថែមថា ដោយឡែក គិតចាប់ពីឆ្នាំ២០០៥ រហូតដល់ដំណាច់ឆ្នាំ២០២៣ ការិយាល័យច្រកចេញចូលតែមួយនៃ រដ្ឋបាលក្រុង ស្រុក ខណ្ឌ ផ្តល់សេវារដ្ឋបាលជូនប្រជាពលរដ្ឋចំនួន១៥.០៧៣.២០៨ សេវា និងទទួលបានចំណូលសរុបចំនួន ១៥៩.៣៩៧.៥៥០.៧៦០ រៀល ស្មើនឹង ៣៩.៨៤៩.៣៨៧ ដុល្លារអាម៉េរិក។ ជារួមក្នុងមួយឆ្នាំៗ ចំណូលនៅថ្នាក់រាជធានី ខេត្តមានប្រហែល ២០លាន ដុល្លារ និងថ្នាក់ក្រុង ស្រុក ខណ្ឌ ប្រហែល ៥លានដុល្លារ។

ឯកឧត្ដមបញ្ជាក់បន្ថែមថា ចំណូលខាងលើនេះត្រូវបានកត់ត្រាជាចំណូលផ្ទាល់របស់រដ្ឋបាលថ្នាក់ ក្រោមជាតិសាមីនីមួយៗ។ ដោយចែងចែកជា២មុខសញ្ញា រួមមាន៖ ១). ក្នុងកម្រិត៨០%-៩០% សម្រាប់ធ្វើការអភិវឌ្ឍនៅមូលដ្ឋានផ្ទាល់ និង២).១០%-២០% ជាការឧបត្ថម្ភដល់ មន្ត្រីបំពេញការងារ។ រដ្ឋបាលរាជធានី ខេត្ត រដ្ឋបាលក្រុង ស្រុក ខណ្ឌ និងរដ្ឋបាលឃុំ សង្កាត់ គឺជាអ្នករក្សាទុក បែងចែក និងធ្វើកិច្ចបញ្ជីការគណនេយ្យលើចំណូលដែលខ្លួនទទួល បាន ស្របតាមការកំណត់ក្នុងលិខិតបទដ្ឋានគតិយុត្តជាធរមាន ៕