ឯកឧត្ដម សួស ប្រាថ្នា៖ ក្រសួងមហាផ្ទៃ កំពុងបង្កើត App ដើម្បីឲ្យពលរដ្ឋអាចដាក់ពាក្យបណ្ដឹង ពាក់ព័ន្ធច្រកចេញចូលតែមួយ ឬសំណូមពរនានា

ភ្នំពេញ៖ ឯកឧត្ដម សួស ប្រាថ្នា អគ្គនាយក នៃអគ្គនាយកដ្ឋានរដ្ឋបាល ក្រសួងមហាផ្ទៃ បានឲ្យដឹងថា ក្រសួងមហាផ្ទៃ កំពុងបង្កើត App មួយ ដើម្បីឲ្យប្រជាពលរដ្ឋអាចដាក់ពាក្យបណ្ដឹង ពាក់ព័ន្ធការងារនៅតាមច្រកចេញចូលតែមួយ ឬសំណូមពរ និងបញ្ហាអ្វីមួយ ដើម្បីឲ្យរដ្ឋបាលថ្នាក់ក្រោមជាតិបានដឹង និងយកទៅដោះស្រាយ ហើយរដ្ឋបាលថ្នាក់ជាតិ ក៏ត្រូវតាមដានពីការដោះស្រាយនោះ។

នៅក្នុងសន្និសីទសារព័ត៌មានស្តីពីការ ផ្ដល់សេវាតាមច្រកចេញចូលតែមួយ កាលពីថ្ងៃទី១៤ មិថុនា ឯកឧត្ដម សួស ប្រាថ្នា មានប្រសាសន៍ថា យន្តការច្រកចេញចូលតែមួយ ជាទីតាំងប្រមូលផ្ដុំសេវារដ្ឋបាលនានា ដែលស្ថិតក្នុងដែនសមត្ថកិច្ច រដ្ឋបាលថ្នាក់ក្រោមជាតិគ្រប់លំដាប់ថ្នាក់ បង្កើតឡើងដើម្បីឆ្លើយតបនឹងតម្រូវការរបស់ប្រជាពលរដ្ឋ ប្រកបដោយគុណភាព ប្រសិទ្ធភាព តម្លាភាព គណនេយ្យភាព បរិយាបន្ន និងសមធម៌ ពិសេសការបង្ខិតការផ្ដល់សេវា ឲ្យកាន់តែគៀកជូនពលរដ្ឋ ហើយការងារនេះ នៅតែជាអទិភាពក្នុងកំណែទម្រង់វិមជ្ឈការ និងវិសហមជ្ឈការ របស់រាជរដ្ឋាភិបាល អាណត្តិទី៧ នៃរដ្ឋសភា ។

ឯកឧត្ដមអគ្គនាយក បន្តថា ពាក់ព័ន្ធនឹងការជំរុញឲ្យយន្តការបម្រើសេវា នៅតាមច្រកចេញចូលតែមួយ កាន់តែមានប្រសិទ្ធភាព ឬពលរដ្ឋមានបញ្ហាមិនសប្បាយចិត្តអ្វីមួយ ពីការផ្ដល់សេវារបស់អាជ្ញាធរ ក្រសួងមហាផ្ទៃ កំពុងបង្កើតអែប ដើម្បីទទួលមតិប្រជាពលរដ្ឋ អាចដាក់ពាក្យបណ្ដឹងតវ៉ាលើករណីផ្សេងៗ តាមAppនោះបាន ។

ឯកឧត្ដមអគ្គនាយក បានបន្ថែមថា ចំពោះការទទួលយកសេវា តាមច្រកចេញចូលតែមួយនេះ គឺរហូតមកដល់ ពេលបច្ចុប្បន្ន ប្រជាពលរដ្ឋបានយល់ច្បាស់យ៉ាងទូលំទូលាយ និងទៅទទួលសេវាជាហូរហែរ ប៉ុន្តែយ៉ាងណាក៏ដោយ សូមប្រជាពលរដ្ឋ ដែលមានតម្រូវការអ្វីមួយ សូមអញ្ជើញទៅទទួលសេវាផ្ទាល់ ដើម្បីបានដឹងពីប្រសិទ្ធភាពការផ្ដល់សេវា ឬអាចឲ្យមន្ត្រីពន្យល់ពីការងារអ្វីមួយឲ្យបានច្បាស់លាស់ ជាជាងពឹងពាក់លើអ្នករត់ការ ។

ឯកឧត្ដមអគ្គនាយក បានគូរបញ្ជាក់ថា ដើម្បីឲ្យយន្តការច្រកចេញចូលតែមួយ កាន់តែទទួលបានលទ្ធផលល្អបន្ថែមទៀត ស្នើទៅក្រសួងស្ថាប័នពាក់ព័ន្ធផងដែរ សូមពង្រឹងសមត្ថភាពបន្ថែមមន្ត្រីប្រចាំការ តាមរយៈការបើកវគ្គបណ្ដុះបណ្ដាល ពិសេសសូមមន្ត្រីទាំងអស់ធ្វើការប្រកបដោយក្រមសីលធម៌ មានវិជ្ជាជីវៈ រុះរាយចំពោះប្រជាពលរដ្ឋ ដែលទៅទទួលសេវា ដើម្បីកុំឲ្យមានការថ្នាំងថ្នាក់ពីពួកគាត់ ៕