ឯកឧត្តម ឈាង វុន ដឹកនាំកិច្ចប្រជុំពិនិត្យពិភាក្សាលើការវាយតម្លៃរបស់ក្រុមប្រឹក្សានីតិកម្ម នៃក្រសួងសេដ្ឋកិច្ច និងហិរញ្ញវត្ថុមកលើសា្ថប័ននីតិប្បញ្ញត្តិ

ភ្នំពេញ៖​ ឯកឧត្តម ឈាង វុន ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា នាព្រឹកថ្ងៃទី១៩ ខែមិថុនា ឆ្នាំ២០២៤ បានអញ្ជើញដឹកនាំកិច្ចប្រជុំពិនិត្យពិភាក្សាលើការវាយតម្លៃរបស់ក្រុមប្រឹក្សានីតិកម្ម នៃក្រសួងសេដ្ឋកិច្ច និងហិរញ្ញវត្ថុមកលើថវិកាស្ថាប័ននីតិប្បញ្ញត្តិ។

ឯកឧត្តម ឈាង វុន បានមានប្រសាសន៍ថា​ កិច្ចប្រជុំនាថ្ងៃនេះមានគោលបំណងចង់ឱ្យ ឯកឧត្តម លោកជំទាវ ជាសមាជិក សមាជិកា រដ្ឋសភា ព្រឹទ្ធសភា សិក្សាស្វែងយល់ពីយុទ្ធសាស្រ្តនៃការកែទម្រង់ប្រព័ន្ធថវិកាឆ្នាំ២០១៨-២០២៥ ដែលបានជ្រើសរើសប្រព័ន្ធថវិកាព័ត៌មានសមិទ្ធកម្មជាទិសដៅ សម្រាប់ការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈដំណាក់កាលទី៤” គណនេយ្យសមិទ្ធកម្ម”។

សូមបញ្ជាក់ជូនថា សម្រាប់ទិសដៅនៅឆ្នាំ២០២៥ ការរៀបចំថវិកានឹងត្រូវផ្អែកទៅលើក្របខ័ណ្ឌចំនួនបីរួមមាន (១)ក្របខ័ណ្ឌម៉ាក្រូសេដ្ឋកិច្ច​ និងហិរញ្ញវត្ថុសាធារណៈរយៈពេលមធ្យម (២)ក្របខ័ណ្ឌថវិការយ:ពេលមធ្យម និង(៣)ផែនការយុទ្ធសាស្ត្រថវិការបស់ក្រសួង-ស្ថាប័ន និងរាជធានី-ខេត្ត។ ដូចនេះស្ថាប័ននីតិប្បញ្ញត្តិនឹងមានភារកិច្ចកាន់តែសំខាន់ ដើម្បីធានាថាថវិកាជាតិត្រូវបានគ្រប់គ្រងចាត់ចែង​ និងប្រើប្រាស់ប្រកបដោយប្រសិទ្ធភាព និងគណនេយ្យភាព ៕