ធនាគារជាតិនៃកម្ពុជា៖ កម្ពុជាទាក់ទាញការវិនិយោគផ្ទាល់ពីបរទេស៤៨,៤ពាន់លានដុល្លារ ក្នុងរយៈពេល៦ឆ្នាំចុងក្រោយ

ភ្នំពេញ៖ ធនាគារជាតិនៃកម្ពុជា (NBC) បានអះអាងនៅថ្ងៃទី១៩ ខែមិថុនាថា ប្រទេសកម្ពុជាបានទាក់ទាញការវិនិយោគផ្ទាល់ពីបរទេស (FDI) សរុបចំនួន៤៨,៤ពាន់លានដុល្លារចាប់ពីឆ្នាំ២០១៨ ដល់ឆ្នាំ ២០២៣។

យោងតាមសេចក្តីប្រកាសព័ត៌មានរបស់ធនាគារជាតិនៃកម្ពុជា (NBC) បានបង្ហាញថា ប្រភពសំខាន់នៃ FDI គឺមកពីប្រទេសចិនចំនួន៤៥,៦ភាគរយនៃ FDI សរុប បន្ទាប់មកគឺកូរ៉េខាងត្បូង សិង្ហបុរី ជប៉ុន វៀតណាម ម៉ាឡេស៊ី ថៃ កាណាដា និងចក្រភពអង់គ្លេស»។

សេចក្តីប្រកាសបានបន្ថែមថា លំហូរនៃការវិនិយោគត្រូវបានវិនិយោគទៅក្នុងវិស័យសំខាន់ៗនៃសេដ្ឋកិច្ច រួមទាំងសកម្មភាពហិរញ្ញវត្ថុ ផលិតកម្ម អចលនទ្រព្យ កន្លែងស្នាក់នៅ កសិកម្ម ថាមពល និងសំណង់ ក្នុងចំណោមវិស័យផ្សេងៗទៀត»។

ជុំវិញរឿងរ៉ាវនេះ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មកម្ពុជា ឯកឧត្តម ប៉ែន សុវិជាតិ បានលើកឡើងថា កិច្ចព្រមព្រៀងភាពជាដៃគូសេដ្ឋកិច្ចទូលំទូលាយក្នុងតំបន់ (RCEP) និងកិច្ចព្រមព្រៀងពាណិជ្ជកម្មសេរីទ្វេភាគី (FTAs) ក៏ដូចជាច្បាប់ថ្មីរបស់កម្ពុជាស្តីពីការវិនិយោគ គឺជាកត្តាសំខាន់ដើម្បីទាក់ទាញលំហូរ FDI មកកាន់ប្រទេសកម្ពុជា។

ឯកឧត្តមក៏បានថ្លែងប្រាប់សារព័ត៌មានចិនស៊ីនហួថា៖«RCEP និង FTAs ផ្សេងទៀត គឺជាមេដែកដើម្បីឆក់យកវិនិយោគិនបរទេសមកកម្ពុជា។ ការវិនិយោគផ្ទាល់ពីបរទេស ជាពិសេសពីប្រទេសចិន គឺជាកត្តាសំខាន់ក្នុងការជួយជំរុញកំណើនសេដ្ឋកិច្ច និងពាណិជ្ជកម្មរបស់កម្ពុជា»។ គួរបញ្ជាក់ថា ប្រទេសកម្ពុជាយើងបច្ចុប្បន្នមាន FTA ជាមួយចិន កូរ៉េខាងត្បូង និងអារ៉ាប់រួម៕