ឯកឧត្តម ហ្សង់ ហ្វ្រង់ស្វ័រ តាន់៖ សម្ដីរបស់ឯកឧត្តមទេសរដ្ឋមន្ត្រី លី ស៊ានឡុង កាលពីឆ្នាំ២០១៩ ដែលថា «វៀតណាមឈ្លានពានកម្ពុជា» មិនបានធ្វើឱ្យប៉ះពាល់ដល់ទំនាក់ទំនងប្រទេសទាំងពីរនោះទេ
ភ្នំពេញ៖ ឯកឧត្តម ហ្សង់ ហ្វ្រង់ស្វ័រ តាន់ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការបរទេស និងសហប្រតិបត្តិការអន្តរជាតិ បានថ្លែងថា ទំនាក់ទំនងរវាងប្រទេសកម្ពុជា និងសិង្ហបុរី ដែលល្អក់កករបន្តិច កាលពីឆ្នាំ២០១៩ ហើយក្រោយមកក៏បានល្អប្រសើរជាធម្មតាឡើងវិញ ដោយសារតែមានជំនួបតាមទូរស័ព្ទ និងតាមរយៈជំនួបផ្ទាល់របស់មេដឹកនាំនៃប្រទេសទាំងពីរ។
ឯកឧត្តម ហ្សង់ ហ្វ្រង់ស្វ័រ តាន់ បានថ្លែងយ៉ាងដូច្នេះ នាល្ងាចថ្ងៃទី១៩ ខែមិថុនា ឆ្នាំ២០២៤នេះ ក្នុងសន្និសីទសារព័ត៌មានស្តីពី លទ្ធផលនៃដំណើរបំពេញទស្សនកិច្ចផ្លូវការរបស់សម្តេចធិបតី ហ៊ុន ម៉ាណែត ទៅកាន់ប្រទេសសិង្ហបុរី។
ពាក់ព័ន្ធនឹងទំនាក់ទំនងកម្ពុជា-សិង្ហបុរី ដែលមានបញ្ហាកាលពីឆ្នាំ២០១៩ ឯកឧត្តម ហ្សង់ ហ្វ្រង់ស្វ័រ តាន់ បានបញ្ជាក់ថា ជាការពិតនៅឆ្នាំ២០១៩ កម្ពុជាដែលមានការភ្ញាក់ផ្អើល បានបញ្ចេញប្រតិកម្មចំពោះការលើកឡើងបែបនេះរបស់ ឯកឧត្តម លី ស៊ានឡុង ទេសរដ្ឋមន្ត្រី នៃសាធារណរដ្ឋសិង្ហបុរី ដែលកាលសម័យនោះជានាយករដ្ឋមន្ត្រីសិង្ហបុរី នៅទីផុត និងយ៉ាងលឿងរហ័ស ទំនាក់ទំនង កម្ពុជា-សិង្ហបុរី បានវិលមករកប្រក្រតីភាពវិញ ដោយសារតែមានការទាក់ទងគ្នាតាមទូរស័ព្ទរវាងថ្នាក់ដឹកនាំ និងដោយសារមានការជួបគ្នាផ្ទាល់រវាងថ្នាក់ដឹកនាំ។
ឯកឧត្តម ហ្សង់ ហ្វ្រង់ស្វ័រ តាន់ បានបន្តថា នៅក្នុងទំនាក់ទំនងរវាងរដ្ឋនិងរដ្ឋ ដូចគ្នានឹងរវាងមនុស្សនិងមនុស្សដែរ ហើយអ្វីដែលសំខាន់គឺមិនមែនអតីតកាលដែលជាពិសេសអតីតកាលដែលមានការរកាំរកុះដែលមានបញ្ហា និងរឿងរ៉ាវមួយចំនួន ក្នុងនោះអ្វីដែលសំខាន់គឺបច្ចុប្បន្នកាល និងអនាគតកាល។
ឯកឧត្តមរដ្ឋមន្ត្រីប្រតិភូ បានបញ្ជាក់ថា សម្រាប់អនាគតកាលរវាងកម្ពុជា និងសិង្ហបុរី សូមជឿជាក់លើរាជរដ្ឋាភិបាលកម្ពុជា គឺច្បាស់ជាល្អ ជិតស្និទ្ធនឹងប្រកបដោយផ្លែផ្កាដោយសារនៅក្នុងដំណើររបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ទៅកាន់ប្រទេសសិង្ហបុរី សម្តេចបានជួបជាមួយថ្នាក់ដឹកនាំកំពូលៗទាំងអស់របស់សិង្ហបុរី ហើយកម្ពុជានិងសិង្ហបុរី សុទ្ធតែគិតដល់សាមគ្គីភាពរវាងគ្នា ក្នុងនាមជាសមាជិកនៃអាស៊ានដូចគ្នា និងក្នុងនាមជាដៃគូរសេដ្ឋកិច្ច ដែលនឹងមានទំនាក់ទំនងកាន់តែជិតស្និទ្ធខ្លាំងឡើងៗក្នុងតំបន់ផងដែរ។
ឯកឧត្តមរដ្ឋមន្ត្រីប្រតិភូ បានអះអាងថា កម្ពុជា-សិង្ហបុរី បានសំឡឹងមើលទៅអនាគតដូចគ្នាថា នឹងធ្វើដូចម្តេចដើម្បីប្រយោជន៍រួម ដើម្បីមានលទ្ធភាពទាញផលចំណេញខាងសេដ្ឋកិច្ចពីគ្នាទៅវិញទៅមក នៅក្នុងស្មារតីគោរពគ្នាទៅវិញទៅមក ក្នុងស្មារតីយោគយល់គ្នាទៅវិញទៅមក ៕
