អគ្គលេខាធិការ អាជ្ញាធរទន្លេសាប ចុះពិនិត្យ និងទប់ស្កាត់សកម្មភាពឈូសឆាយដីព្រៃលិចទឹក ស្ថិតក្នុងភូមិសាស្រ្តសង្កាត់ជ្រាវ ក្រុងសៀមរាប

ភ្នំពេញ៖ នាថ្ងៃទី២១ ខែមិថុនា ឆ្នាំ២០២៤ ដោយទទួលបានបទបញ្ជាណែនាំពី ឯកឧត្តមរដ្ឋមន្រ្តី ថោ ជេដ្ឋា ប្រធានអាជ្ញាធរទន្លេសាប ឯកឧត្តម សរ គឹមសាន្ត អគ្គលេខាធិការ អមដោយ ឯកឧត្តម ខូវ មាស អគ្គលេខាធិការរង រួមជាមួយមន្រ្តីបច្ចេកទេសអគ្គលេខាធិការដ្ឋាន អាជ្ញាធរទន្លេសាប បានដឹកនាំប្រតិភូអន្តរក្រសួងស្ថាប័ន រួមមាន ក្រសួងរៀបចំដែនដី នគរូបនីយកម្ម និងសំណង់ ក្រសួងកសិកម្ម រុក្ខាប្រមាញ់ និងនេសាទ ក្រសួងបរិស្ថាន ដោយសហការជាមួយអាជ្ញាធររដ្ឋបាលខេត្ត កងកម្លាំងមានសមត្ថកិច្ចខេត្ត មន្ទីរជំនាញជុំវិញខេត្ត និងអាជ្ញាធរមូលដ្ឋានក្រុងសៀមរាប និងសង្កាត់ជ្រាវ នៃខេត្តសៀមរាប ដែលមានសមាសភាពចូលរួមសរុបចំនួន២៤នាក់ ចុះពិនិត្យទីតាំងជាក់ស្តែង និងចាត់វិធានការទប់ស្កាត់សកម្មភាពឈួសឆាយទន្ទ្រានដីព្រៃលិចទឹកក្នុងតំបន់២ ស្ថិតក្នុងទីតាំងភូមិសាស្រ្តខាងលើ ដោយអនុវត្តតាមច្បាប់ និងបទបញ្ញត្តិដែលមានស្រាប់ ក្នុងការហាមឃាត់ការឈូសឆាយដីព្រៃ និងធ្វើការកសាងហេដ្ឋារចនាសម្ព័ន្ធក្នុងតំបន់២ ដែលនាំឱ្យប៉ះពាល់របបទឹក គម្របដី ជីវចម្រុះ និងប្រព័ន្ធអេកូឡូស៊ី ។ល។

ក្នុងដំណើរចុះពិនិត្យនេះផងដែរ ឯកឧត្តមបានជម្រុញអាជ្ញាធរមូលដ្ឋានបង្កើនការយកចិត្តទុកដាក់បន្ថែមទៀតក្នុងការអប់រំផ្សព្វផ្សាយ ពន្យល់ ណែនាំអំពីខ្លឹមសារស្មារតីអនុក្រឹត្យលេខ ៨៣ អនក្រ.បក ចុះថ្ងៃទី២៦ ខែមេសា ឆ្នាំ២០២៣ ស្តីពីការកំណត់សិទ្ធិប្រើប្រាស់ និងអាស្រ័យផលលើដីរដ្ឋ ក្នុងដែនដីតំបន់ទ្រនាប់នៃដែនព្រៃលិចទឹក (តំបន់២) ជុំវិញបឹងទន្លេសាបស្ថិតក្នុងភូមិសាស្រ្តខេត្តកំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប និងខេត្តកំពង់ធំ ។

សូមបញ្ជាក់ថា តំបន់បឹងទន្លេសាប ត្រូវបានបែងចែកជា ៣ តំបន់ :
-តំបន់១ ជាតំបន់លំនៅដ្ឋាន ឬភូមិករ និងជាតំបន់បង្កបង្កើនផលរបស់ប្រជាពលរដ្ឋ ដែលទទួលបានសិទ្ធិកាន់កាប់ស្របច្បាប់ (ប័ណ្ណកម្មសិទ្ធិ)
-តំបន់២ ជាតំបន់ប្រើប្រាស់អាស្រ័យផល ស្រូវឡើងទឹកនិងប្រដេញទឹក និងក៏ជាតំបន់ទ្រនាប់ការពារ
-តំបន់៣ តំបន់ព្រៃលិចទឹក ហាមប៉ះពាល់ដាច់ខាត និងត្រូវការពារឱ្យខានតែបាន ៕