ឯកឧត្តមសន្តិបណ្ឌិត ឡូយ សុផាត អញ្ជើញដឹកនាំកិច្ចប្រជុំផ្ទៃក្នុងគណៈកម្មការទី៣ នៃរដ្ឋសភា
ភ្នំពេញ៖ ឯកឧត្តមសន្តិបណ្ឌិត ឡូយ សុផាត ប្រធានគណៈកម្មការផែនការ វិនិយោគ កសិកម្ម រុក្ខាប្រមាញនេសាទ អភិវឌ្ឍន៍ជនបទ បរិស្ថាន ធនធានទឹក និងឧតុនិយម នៃរដ្ឋសភា (គណៈកម្មការទី៣)
នៅព្រឹកថ្ងៃទី២៤ ខែមិថុនា ឆ្នាំ២០២៤ បានអញ្ជើញដឹកនាំកិច្ចប្រជុំផ្ទៃក្នុងគណៈកម្មការ ដើម្បីពិភាក្សាអំពីការត្រៀមផែនការសកម្មភាពការងារគណៈកម្មការ ក្នុងអំឡុងពេលវិស្សមកាលរបស់រដ្ឋសភានាពេលខាងមុខ និងត្រៀមជួបពិភាក្សាការងារជាមួយបណ្តាក្រសួងនានាដែលពាក់ព័ន្ធនិងវិស័យទទួលបន្ទុករបស់គណ:កម្មការ។
កិច្ចប្រជុំនេះធ្វើឡើងនៅបន្ទប់ប្រជុំគណ:កម្មការទី៣ នៃវិមានរដ្ឋសភា ដោយមានការអញ្ជើញចូលរួមពី ឯកឧត្តមលេខាធិការ សមាជិក សមាជិកាគណ:កម្មការ ទីប្រឹក្សាអមគណ:កម្មការ និងមន្រ្តីជំនួយការផងដែរ។
ឯកឧត្តមប្រធានគណៈកម្មការ បានមានប្រសាសន៍ជម្រាបជូនអង្គប្រជុំ អំពីការត្រៀមជួបប្រជុំពិភាក្សាការងារជាមួយក្រសួងអភិវឌ្ឍន៍ជនបទនៅថ្ងៃទី៩ ខែកក្កដា ឆ្នាំ២០២៤ និងការជួបប្រជុំជាមួយក្រសួងផែនការនៅថ្ងៃទី១០ ខែកក្កដា ឆ្នាំ២០២៤ ព្រមទាំងការងារត្រៀមចុះបំពេញបេសកកម្មនៅមូលដ្ឋាន មានដូចជា ខេត្តកំពង់ចាម ត្បូងឃ្មុំ និងខេត្តក្រចេះ នៅក្នុងអំឡុងពេលវិស្សមកាលនាចុងខែកក្កដា ខាងមុខនេះ៕
