រដ្ឋមន្ត្រីក្រសួងធនធានទឹក ទទួលជួបសម្តែងការគួរសមជាមួយគណៈប្រតិភូក្រុមហ៊ុនអេស.អេច.ស៊ីអិន.ឌីវេឡុបមិន
ភ្នំពេញ៖ នៅទីស្តីការក្រសួង នារសៀលថ្ងៃទី២៤ ខែមិថុនា ឆ្នាំ២០២៤ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានទទួលជួបសម្តែងការគួរសម និងពិភាក្សាការងារជាមួយគណៈប្រតិភូក្រុមហ៊ុនអេស.អេច.ស៊ីអិន.ឌីវេឡុបមិន ឯ.ក និងក្រុមហ៊ុនជាដៃគូជាតិនិងអន្តរជាតិ ដឹកនាំដោយលោក សោម សីហា អគ្គនាយកក្រុមហ៊ុន។
សូមជម្រាបថា ជំនួបពិភាក្សានាពេលនេះផ្ដោតជាសំខាន់ពាក់ព័ន្ធនឹងសុខភាពទន្លេនិងការស្ដារសំអាតទន្លេ ដើម្បីធានាប្រក្រតីភាពរំហូរទឹកទន្លេ និងកាត់បន្ថយហានិភ័យពីការបាក់ច្រាំងទន្លេជាដើម។
ជាកិច្ចចាប់ផ្តើម ឯកឧត្តមរដ្ឋមន្ត្រី បានសម្តែងនូវការស្វាគមន៍យ៉ាងកក់ក្តៅចំពោះវត្តមានរបស់គណៈប្រតិភូក្រុមហ៊ុនអេស.អេច.ស៊ីអិន.ឌីវេឡុបមិន ឯ.ក និងដៃគូទាំងអស់ដែលចាប់អារម្មណ៍ក្នុងការវិនិយោគនៅក្នុងប្រទេសកម្ពុជា ដើម្បីរួមចំណែកក្នុងការជំរុញកំណើនសេដ្ឋកិច្ច និងការបង្កើតការងារជូនដល់ប្រជាពលរដ្ឋកម្ពុជា។
ឯកឧត្តមរដ្ឋមន្ត្រីបានជម្រាបជូនគណៈប្រតិភូក្រុមហ៊ុនទាំងអស់ថា រាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំប្រកបដោយភាពឈ្លាសវៃ និងប៉ិនប្រសប់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានយកចិត្តទុកដាក់ជាខ្លាំងលើការគ្រប់គ្រងអាងទន្លេ និងសុខភាពប្រព័ន្ធផ្លូវទឹក ដោយបានដាក់ចេញនូវគោលនយោបាយ ឯកសារគតិយុត្តនានា និងអនុក្រឹត្យស្តីពីការគ្រប់គ្រងអាងទន្លេ ព្រមទាំងបានបង្កើតគណៈកម្មាធិការជាតិគ្រប់គ្រងអាងទន្លេ ដើម្បីការពារធនធានទឹក រក្សាបាននូវប្រព័ន្ធអេកូឡូស៊ី ការអភិរក្ស និងការអភិវឌ្ឍសង្គម-សេដ្ឋកិច្ចប្រកបដោយចីរភាព ដោយអនុលោមតាមច្បាប់ស្តីពីការគ្រប់គ្រងធនធានទឹកនៅក្នុងព្រះរាជាណាចក្រកម្ពុជា។
ជាការឆ្លើយតបតំណាងក្រុមហ៊ុនបានថ្លែងអំណរគុណយ៉ាងជ្រាលជ្រៅដល់ឯកឧត្តមរដ្ឋមន្ត្រី ដែលបានអនុញ្ញាតឱ្យតំណាងក្រុមហ៊ុនទាំងអស់បានចូលជួបសម្តែងការគួរសម និងពិភាក្សារការងារដោយផ្ទាល់ ព្រមទាំងបានជម្រាបជូនអំពីព័ត៌មានសាវតារ និងប្រតិបត្តិការរបស់ក្រុមហ៊ុនផងដែរ៕
