អភិបាលខេត្តក្រចេះ អញ្ជើញជាអធិបតីក្នុងសិក្ខាសាលាពិគ្រោះយោបល់ស្តីពី “ការអភិរក្ស និងការស្តារឡើងវិញនូវសត្វក្តាន់ ក្នុងដែនជម្រកសត្វព្រៃព្រែកប្រសព្វ”

ភ្នំពេញ៖ នៅព្រឹកថ្ងៃទី២៥ ខែមិថុនា ឆ្នាំ២០២៤ ឯកឧត្តម វ៉ា ថន អភិបាលខេត្តក្រចេះ អញ្ជើញជាអធិបតីក្នុងសិក្ខាសាលាពិគ្រោះយោបល់ ស្តីពី “ការអភិរក្ស និងការស្តារឡើងវិញនូវសត្វក្តាន់ ក្នុងដែនជម្រកសត្វព្រៃព្រែកប្រសព្វ”។

តាមរបាយកាណ៍របស់អង្គការអភិរក្សសត្វព្រៃ WWF បានបញ្ជាក់ឲ្យដឹងថា តាមរយៈការដាក់ម៉ាស៊ីនថតស្វ័យប្រវត្តិ និងការប្រើឧបករណ៍ដ្រូននៅក្នុងការសិក្សា ជាលទ្ធផល សត្វក្តាន់ មានដង់ស៊ីតេប្រមាណ៤២ក្បាលនៅក្នុង១គម និងមានចំនួនសត្វក្តាន់សរុប៨៤ក្បាលនៅក្នុងផ្ទៃដីក្រឡា ២គម ដែលជាទីតាំងសិក្សានៅផ្នែកខាងជើងនៃដែនជម្រកនៅក្នុងរដូវប្រាំងប៉ុណ្ណោះ ។

បច្ចុប្បន្នប្រភេទសត្វក្តាន់នេះ កំពុងប្រឈមទៅនឹងការគំរាមកំហែងយ៉ាងធ្ងន់ធ្ងរ រួមមានការបាត់បង់ទីជម្រក ដោយការទន្ទ្រានដីព្រៃសម្រាប់ធ្វើកសិកម្ម ការកាប់ព្រៃ និងការប្រម៉ាញ់ជាដើម។ ហើយការសិក្សាបន្ថែមកំពុងប្រព្រឹត្តទៅ ដើម្បីទទួលបានទិន្នន័យពេញលេញ ពីប្រជាករសរុបរបស់សត្វក្តាន់ លក្ខខណ្ឌជីវៈសាស្ត្រ និងទីជម្រករបស់វា។

អង្គការបន្តថា គោលបំណងរបស់អង្គការគឺដើម្បី ៖-ពិនិត្យនិងបង្កើតយន្តការប្រសិទ្ធភាពរយៈពេលវែងក្នុងការការពារ និងគ្រប់គ្រងដែនជម្រកសត្វព្រៃ ដើម្បីចូលរួមអភិរក្សសត្វក្តាន់និងទីជម្រករបស់វា ដោយមានការគាំទ្រពីរាជរដ្ឋាភិបាលនិងប្រជាជនមូលដ្ឋាន-ពង្រឹងការយល់ដឹងនិងតាមដានប្រជាករសត្វក្តាន់សរុប ព្រមទាំងទីជម្រករបស់វាតាមរយៈការតាមដានទៀងទាត់ដោយប្រើប្រាស់វិធីសាស្ត្រស្តង់ដារ-លើកទឹកចិត្តការចូលរួមរបស់សហគមន៍មូលដ្ឋាន ក្នុងការចូលរួមកិច្ចការងារអភិរក្ស រក្សានូវ ទីជម្រក និងស្តារឡើងវិញ ដោយលើកស្ទួយជីវៈភាពរស់នៅរបស់ប្រជាជន-បង្កើតកម្មវិធីបង្កាត់ពូជសត្វក្តាន់នៅនឹងទីតាំងអភិរក្សដែលមានវត្តមានសត្វក្តាន់តិចតួចនៅក្នុងបរិវេណ នៃដែនជម្រកសត្វព្រៃព្រែកប្រសព្វ ដោយរៀបចំទីតាំងបង្កាត់ពូជយ៉ាងហោចណាស់ឱ្យបានសត្វក្តាន់មេចំនួន១០ក្បាលនៅក្នុងឆ្នាំ២០២៦-រៀបចំកម្មវិធីស្តារនិងលែងសត្វក្តាន់ទៅធម្មជាតិវិញទាំងនៅក្នុងដែនជម្រកសត្វព្រៃព្រែកប្រសព្វ ឬទី ជម្រកសមស្របផ្សេងទៀតនៅក្នុងឆ្នាំ២០២៧ ។

ថ្លែងក្នុងឱកាសនោះ ឯកឧត្តម វ៉ា ថន អភិបាលខេត្តក្រចេះ បានមានប្រសាសន៍បញ្ជាក់ថា តំបន់សត្វក្តាន់នេះ ត្រូវបានបង្កើតជាដែនជម្រកសត្វព្រៃព្រែកប្រសព្វ ដែលមាន ទំហំ១២,៧៧០ហិកតា នៅឆ្នាំ២០១៨ ដោយក្រសួងបរិស្ថានតាមរយៈ អនុក្រឹតលេខ១២៨ និងបានកែប្រែទំហំរបស់វាទៅ១៤,២២១ហិកតា ដោយអនុក្រឹតលេខ១៩០សជណ នៅឆ្នាំ២០២៣ ។

ឯកឧត្តម វ៉ា ថន បានថ្លែងការកោតសរសើរចំពោះអង្គការWWF ដែលតែងតែរួមសហការគាំទ្រ ដើម្បីបង្កើតកម្មវិធីជាច្រើនក្នុងការជួយអភិវឌ្ឍលើកកម្ពស់នូវជីវភាពរស់នៅរបស់ប្រជាសហគមន៍នៅមូលដ្ឋាន តាមរយ:ការការពារអភិរក្ស និងស្តារឡើងវិញនូវជីវ:ចម្រុះ ជាពិសេសការអភិរក្សសត្វក្តាន់ ។

ឯកឧត្តម វ៉ា ថន បន្តថា ដើម្បីចូលរួមការពារ និងអភិរក្ស ព្រមជាមួយការស្តារសត្វក្តាន់ សត្វផ្សោត និងជីវៈចម្រុះ ឱ្យមាននិរន្តរភាព គឺត្រូវបញ្ឍប់ការកាប់បំផ្លាញ់ព្រៃលិចទឹក ការឆក់ ការបរបាញ់ ដាក់អន្ទាក់ បំពុល និងការបរិភោគ ដោយបង្វែរមកការអភិរក្ស និងទាញយកផលប្រយោជន៍តាមរយ:ផ្នែកទេសចរណ៍ បង្កើនការដាំដើមឈើ និងពង្រីកការផ្សព្វផ្សាយដល់មូលដ្ឋាន និងយាមការជាប្រចាំព្រមទាំងរាយការណ៍ ដើម្បីចាត់វិធានការតាមផ្លូវច្បាប់។ ដោយការងារទាំងនេះ មិនមែនជាការងាររបស់អាជ្ញាធរខេត្តតែមួយផ្នែកនោះទេ វាគឺជាកាតព្វកិច្ច និងតម្រូវឱ្យមានការចូលរួមពីបងប្អូនប្រជាមូលដ្ឋានសហគមន៍ ទើបការងារនេះរក្សាបានតុល្យភាព និងផ្តល់សារប្រយោជន៍ដល់សហគមន៍យូរអង្វែង៕