អភិបាលខេត្តបាត់ដំបង៖ មន្រ្តីណា ពាក់ព័ន្ធនឹងការរំលោភក្នុងតំបន់ហាមឃាត់ នឹងត្រូវទទួលរងវិធានការរដ្ឋបាល

ភ្នំពេញ៖ រដ្ឋបាលខេត្តបាត់ដំបង បានរៀបចំកិច្ចប្រជុំស្តីពីការទប់ស្កាត់ការទន្រ្ទានកាន់កាប់ដីរដ្ឋ ក្នុងតំបន់ដែនព្រៃលិចទឹកជុំវិញបឹងទន្លេសាប ក្នុងភូមិសាស្ត្រស្រុកឯកភ្នំ-សង្កែ-មោងឬស្សី និងថ្មគោល នៃខេត្តបាត់ដបង។

កិច្ចប្រជុំនេះ បានធ្វើឡើងនាព្រឹកថ្ងៃទី២៥ ខែមិថុនា ឆ្នាំ២០២៤ នៅសាលប្រជុំសាលាខេត្ត ក្រោមអធិបតីភាព ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង ដោយមានការអញ្ជើញចូលរួម ពីប្រធានមន្ទីរជំនាញពាក់ព័ន្ធ លោក អភិបាលស្រុកទាំងបួន មានស្រុកមោងឬស្សី ស្រុកសង្កែស្រុកឯកភ្នំពេញនិងស្រុកថ្មគោល លោកមេឃុំពាក់ព័ន្ធទាំង១៤ឃុំ នៃស្រុកទាំងបួន ក្នុងខេត្តបាត់ដំបង។

ក្នុងកិច្ចប្រជុំនេះ ឯកឧត្តម សុខ លូ អភិបាលខេត្ត បានអនុញ្ញាតឲ្យអភិបាលស្រុក មន្ទីរជំនាញលោកមេឃុំពាក់ព័ន្ធ ឡើងរាយការណ៍ពីលទ្ធផលនិងបញ្ហាប្រឈមនានាជូនអង្គប្រជុំ ដើម្បីក្តាប់របាយការណ៍ និងរកដំណោះស្រាយ ចាត់វិធានការតាមច្បាប់។

ឯកឧត្តមអភិបាលខេត្ត បានបញ្ជាក់ថា ក្រោយពីស្តាប់របាយការណ៍លទ្ធផល នៃទប់ស្កាត់ការទន្រ្ទានកាន់កាប់ដីរដ្ឋ ក្នុងតំបន់ដែនព្រៃលិចទឹកជុំវិញបឹងទន្លេសាបជាតំបន់ហាមឃាត់ ក្នុងភូមិសាស្ត្រស្រុកឯកភ្នំ-សង្កែ និងមោងឬស្សី និងស្រុកថ្មគោល និងបានរំលឹកថា មន្រ្តីជំនាញពាក់ព័ន្ធយើង បានធ្វើការបោះបង្គោលរវាងព្រំដីហាមឃាត់និងដីដែលរាជរដ្ឋាភិបាល បានឆ្វៀលជូនប្រជាប្រពលរដ្ឋរួចកន្លងមកហើយនោះ និងបង្គោលព្រំរវាងពីឃុំ១ទៅឃុំ១ទៀត ឲ្យបានច្បាស់លាស់ ដោយគ្មានការលួចរំកិលបង្គោលព្រំនោះបានឡើយ។

ជាមួយគ្នានោះ ឯកឧត្តមអភិបាលខេត្ត បានប្រាប់ប្រជាពលរដ្ឋណា ដែលបានរំលោភក្នុងតំបន់ហាមឃាត់កន្លងមក និង ជនណាដែលកំពុងបន្តទន្រ្ទានយកដីបន្តទៀត មន្ទីរជំនាញ អាជ្ញាធរស្រុក ឃុំពាក់ព័ន្ធ ទាំងអស់សូមកុំឲ្យមានការ ពាក់ព័ន្ធ ជាមួយជនល្មើសឡើយ បើមន្រ្តីណាមានការពាក់ព័ន្ធ ត្រូវទទួលរងវិធានការរដ្ឋបាល ហើយមន្រ្តីទាំងអស់ត្រូវសហការគ្នាទប់ស្កាត់ឲ្យបាន និងមិនអនុញ្ញាតឲ្យកើតមាននូវបទល្មើសទាំងអស់នេះ បន្តកើតមានឡើងបន្ថែមទៀត បើជនល្មើសណានៅតែបន្តសកម្មភាពអាណាធិបតេយ្យនេះទៀត គឺយើងជាអាជ្ញាធរមូលដ្ឋានគ្រប់ទីកន្លែង គ្រប់ជំនាញ ត្រូវតែអនុវត្តទៅតាមផ្លូវច្បាប់។

ជាទីបញ្ចប់ ឯកឧត្តម សុខ លូ ក៏បានផ្តាំផ្ញើដល់មន្រ្តីពាក់ព័ន្ធទាំងអស់ក្នុងកិច្ចប្រជុំថា សូមមន្រ្តីពាក់ព័ន្ធទាំងអស់ ត្រូវបន្តផ្សព្វផ្សាយបទបញ្ជាថ្នាក់លើបន្ថែមទៀត ដល់ពលរដ្ឋនៅមូលដ្ឋានរបស់ខ្លួនកុំឲ្យបន្តសកម្មភាពណា ដែលនាំឲ្យខុសច្បាប់ ហើយយើងជាមន្រ្តីត្រូវធ្វើសកម្មភាពត្រួតពិនិត្យរឿងនេះជាប្រចាំដូចភ្លៀងរលឹមដាច់ខាតមិនឲ្យកើតមានទៀតឡើយ ៕