កងពលតូចថ្មើរជើងលេខ៤២ យោធភូមិភាគទី៤ បើកវគ្គហ្វឹកហ្វឺន ពង្រឹងវរសេនាតូច៤២២ បំប៉នជំនាញអាវុធគាំទ្រ ការពារអាកាស និងក្បាច់គុណយុទ្ធក្រម នៃកងយោធពលខេមរភូមិន្ទ
ភ្នំពេញ៖ នាថ្ងៃទី២៥ ខែមិថុនា ឆ្នាំ២០២៤ កងពលតូចថ្មើរជើងលេខ៤២ បានបើកវគ្គហ្វឹកហ្វឺនពង្រឹងវរសេនាតូច៤២២ ហ្វឹកហ្វឺនជំនាញអាវុធគាំទ្រ ជំនាញការពារអាកាស ក្បាច់គុនយុទ្ធក្រម នៃកងយោធពលខេមរភូមិន្ទ និងហ្វឹកហ្វឺនសណ្តាប់ធ្នាប់ទូទៅតាមបណ្តាកងឯកភាព ចំណុះកងពលតូចថ្មើរជើងលេខ៤២ យោធភូមិភាគទី៤ ក្រោមអធិបតីភាព ឧត្តមសេនីយ៍ទោ សុខ រីនណា មេបញ្ជាការរង នាយសេនាធិការ យោធភូមិភាគទី៤ តំណាងដ៏ខ្ពង់ខ្ពស់ ឯកឧត្តម ឧត្តមសេនីយ៍ឯក ពៅ ហេង មេបញ្ជាការរង កងទ័ពជើងគោក និងជាមេបញ្ជាការ យោធភូមិភាគទី៤ ។
លោកឧត្តមសេនីយ៍ត្រី នាក់ វង្ស មេបញ្ជាការ កងពលតូចថ្មើរជើងលេខ៤២ បានឡើងអានមតិស្វាគមន៍ និងរបាយការណ៍ស្តីអំពីផែនការហ្វឹកហ្វឺនដល់អង្គពិធីទាំងមូលបានជ្រាប។
លោកឧត្តមសេនីយ៍ ក៏បានបញ្ជាក់ផងដែរថា ពិធីហ្វឹកហ្វឺននាពេលនេះមានរយៈ ៩១ថ្ងៃ និងបែងចែកជា ៤វគ្គ ដែលមានសិក្ខាកាមសរុបចំនួន ២៨០នាក់ ។
តំណាងកម្មសិក្សាការីក្នុងវគ្គហ្វឹកហ្វឺនបានឡើង ធ្វើការប្តេជ្ញាអស់ពីកម្លាំងកាយចិត្ត ខិតខំប្រឹងប្រែងរៀនសូត្រទាំងផ្នែកទ្រឹស្តី និងការអនុវត្តន៍ជាក់ស្តែងទៅតាមជំនាញនីមួយៗ ដែលខ្លួនបានរៀន អោយទទួលបានលទ្ធផលល្អ ។ គោរពប្រតិបត្តិនូវច្បាប់រដ្ឋធម្មនុញ្ញ នៃព្រះរាជាណាចក្រកម្ពុជា លក្ខន្តិកៈ វិន័យទូទៅ និងវិន័យផ្ទៃក្នុងនៃកងយោធពលខេមរភូមិន្ទអោយបានជាដាច់ខាត និងជៀសវាងអោយឆ្ងាយពីការប្រើប្រាស់គ្រឿងញៀនគ្រប់ប្រភេទ។ ស្មោះត្រង់ដាច់ខាត ចំពោះរាជរដ្ឋាភិបាលកម្ពុជា ដែលមានសម្តេចមហាបវរធបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ជាប្រមុខដឹកនាំ។
ក្នុងឱកាសនោះដែរ ឧត្តមសេនីយ៍ទោ សុក រីនណា មេបញ្ជាការរងនាយសេនាធិការ យោធភូមិភាគទី៤ បានមានប្រសាសន៍ថា វគ្គហ្វឹកហ្វឺនពង្រឹងបំប៉ន ពិតជាមានសារៈសំខាន់ណាស់ចំពោះយោធិនគ្រប់រូប និងបានឆ្លុះបញ្ចាំងឱ្យឃើញពីការកសាងសមត្ថភាព ចំណេះដឹង ចំណេះធ្វើមួយពិតប្រាកដ និងជាក់លាក់លើការងារជំនាញបច្ចេកទេស និងបណ្តុះបណ្តាលធនធានមនុស្ស នៃកងយោធពលខេមរភូមិន្ទ ក្នុងវិស័យពង្រឹងប្រៀបការពារជាតិ និងជាឱកាសសម្រាប់កងទ័ពមានពេលវេលាហ្វឹកហ្វឺនរៀនសូត្រនៅពេលដែលប្រទេសជាតិកំពុងមានសុខសន្តិភាពពេញលេញក្រោមការដឹកនាំប្រកបដោយគតិបណ្ឌិត ឈ្លាសវៃ និងត្រឹមត្រូវ របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។
ជាចុងបញ្ចប់ លោក មេបញ្ជាការរង បានផ្តាំផ្ញើរដល់សិក្ខាកាមទាំងអស់ ត្រូវខិតខំរៀនសូត្រទាំងទ្រឹស្តី និងការអនុវត្តន៍ផ្ទាល់ ខិតខំប្រឹងប្រែង គោរពវិន័យ គោរពពេលវេលារៀនសូត្រ មានសាមគ្គីឯកភាពផ្ទៃក្នុងវគ្គ ត្រូវត្រងត្រាប់ស្តាប់គ្រូឧទ្ទេសនាម ទាំងទ្រឹស្តី និងការអនុវត្តន៍ជាក់ស្តែង សង្ឃឹមថាពេលបញ្ចប់វគ្គទទួលបានលទ្ធផលល្អ៕
