សម្ដេចធិបតី៖ ដរាបណាគណបក្សប្រជាជនកម្ពុជា នៅមានឱកាសដឹកនាំបន្ត ជីវភាព និងកិត្តិយសរបស់អតីតយុទ្ធជន អតីតមន្រ្តីរាជការ នៅតែបន្តយកចិត្តទុកដាក់ និងលើកកម្ពស់ជាបន្តបន្តាប់

ភ្នំពេញ៖ ថ្លែងក្នុងពិធីអបអរសាទរខួបលើកទី១៧ នៃទិវាអតីតយុទ្ធជនកម្ពុជា ឆ្នាំ២០២៤ សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងអះអាងថា ដរាបណាគណបក្សប្រជាជនកម្ពុជានៅមានឱកាសដឹកនាំបន្ត ជីវភាព និងកិត្តិយសរបស់អតីតយុទ្ធជន អតីតមន្រ្តីរាជការ នៅតែបន្តយកចិត្តទុកដាក់និងលើកកម្ពស់ជាបន្តបន្តាប់ តិចច្រើនយើងត្រូវបន្តជួយគ្នាយកចិត្តទុកដាក់

សម្ដេចធិបតីបានមានប្រសាសន៍ថា ការងារសម្រាប់អតីតយុទ្ធមាន៣រួមមាន កិត្តិយស, ជីវភាព និងឱកាស​ ដែលជាគោលដៅចាំបាច់គិតគូរដល់អតីតយុទ្ធជនទាំងអស់នៅក្នុងបន្ទុក។

សម្ដេចបានបញ្ជាក់ថា ការបង្កើតពិធីនេះ ដើម្បីបំផុសស្មារតីកូនខ្មែរជំនាន់ក្រោយគ្រប់រូប មិនថាដប់ឆ្នាំម្ភៃឆ្នាំ ឬហាសិបឆ្នាំនោះទេត្រូវតែនៅបន្តចងចាំ បើចងចាំប្រវត្តិសាស្រ្តហើយត្រូវតែចងចាំអ្នកដែលបានរួមដំណើរក្នុងប្រវត្តិសាស្រ្ត ដោយមិនត្រូវទុកចោលនោះទេ ដែលនេះជាការផ្ដល់នូវកិត្តិយសដល់អតីតយុទ្ធជនទាំងអស់។

សម្ដេចធិបតី គូសបញ្ជាក់ថា មិនមែនចាកចេញពីជួរហើយ រដ្ឋាភិបាលមិនបន្តគិតគូរនោះទេ គឺនៅតែបន្តជួយជ្រោមជ្រែងបន្ថែមទៀតដល់អ្នកដែលបានចូលនិវត្តន៍មុន ហើយនេះគឺជាការតបស្នងមួយ មិនដូចមជ្ឈដ្ឋានខ្លះលើកឡើងថា រដ្ឋាភិបាលទុកអតីតយុទ្ធជន និងអតីតមន្ត្រីរាជការចោលនោះទេ។

បន្ថែមពីនោះ សម្ដេចបានថ្លែងអំណរគុណដល់សប្បុរសជន ជាពិសេសនាយឧត្តមសេនីយ៍ កិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធានទី១ និងជាអគ្គលេខាធិការសមាគមអតីតយុទ្ធជនកម្ពុជា ដែលបានបង្កើតចលនាសាងសង់ផ្ទះបន្តជូនអតីតយុទ្ធជន ដែលខ្វះខាតនៅតាមបណ្ដាខេត្តនានា ក៏ដូចជាបង្កើតនូវភូមិសន្តិភាពមួយផងដែរ ៕