សម្ដេចធិបតី ណែនាំឲ្យអភិបាលខេត្ត ផ្ដល់ដីសម្រាប់ធ្វើស្នាក់ការសមាគមអតីតយុទ្ធជន ព្រោះមិញថានៅសល់ ១២ខេត្តមិនទាន់មានស្នាក់ការ
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងជាអនុប្រធានទី១នៃសមាគមអតីតយុទ្ធជនកម្ពុជា បានណែនាំដល់អភិបាលខេត្តត្រូវផ្ដល់ដីសម្រាប់កសាងស្នាក់ការសមាគមអតីតយុទ្ធជនកម្ពុជា សម្រាប់ខេត្តណាដែលមិនទាន់មានស្នាក់ការ ។
ក្នុងឱកាសអញ្ជើញជាអធិបតីប្រារព្ធពិធីអបអរសាទរខួបលើកទី១៧ ទិវាអតីតយុទ្ធជនកម្ពុជា ២១ មិថុនា នាថ្ងៃទី២៦ ខែមិថុនា ឆ្នាំ២០២៤ សម្ដេចធិបតីនាយករដ្ឋមន្ត្រី ហ៊ុន ម៉ាណែត បញ្ជាក់ថា «សូមបណ្ដារាជធានី-ខេត្តសូមបន្តជួយផ្ដល់ដីដល់សមាគមអតីតយុទ្ធជនដើម្បីធ្វើស្នាក់ការ ព្រោះមិញថានៅសល់១២ខេត្ត។ ទីស្នាក់ការនេះ អត់យកទៅធ្វើទ្រព្យសម្បត្តិឯកឧត្តម គន់ គីម ទេ គឺធ្វើសម្រាប់ស្នាក់ការផ្ដល់សេវា និងទំនាក់ទំនងជូនអតីតយុទ្ធជន ហើយអតីតយុទ្ធជនគឺបន្តរហូត អ៊ំពូមីងនៅទីនេះនៅជាកងទ័ពនៅឡើយ តែទៅមុខនឹងក្លាយទៅជាអតីតយុទ្ធជនដូចគ្នាទេ»។
សម្ដេចធិបតីក៏បានណែនាំអភិបាលខេត្តជួយធ្វើចលនាសប្បុរសជនតាមមូលដ្ឋាន សម្រាប់ជួយទ្រទ្រង់ដល់សមាគមអតីតយុទ្ធជនទៀតផងដែរ ខណៈចំនួនអតីតយុទ្ធជនកាន់តែកើនឡើង ហើយមានតម្រូវការរៀងរាល់ខែរាល់ឆ្នាំ។
សម្ដេចធិបតីបានបន្តថា ការជួយកសាងផ្ទះជូនអតីតយុទ្ធជនក៏ត្រូវធ្វើបន្ត ប៉ុន្តែនៅពេលធ្វើផ្ទះជូនអតីតយុទ្ធជនលើកក្រោយៗ សូមធ្វើបង្គន់អនាម័យជូនពួកគាត់ផង។ ការធ្វើផ្ទះ និងការផ្ដល់ដីជូនដល់អតីតយុទ្ធជន គឺជាគោលនយោបាយមួយធំណាស់។ ចំពោះអតីតយុទ្ធជនដែលខ្វះខាតខ្លាំងជាងគេ គឺត្រូវផ្ដល់អាទិភាពធ្វើផ្ទះឱ្យគាត់មុនគេ។ សម្ដេចបន្តទៀតថា រាជរដ្ឋាភិបាលនឹងព្យាយាមដើម្បីពង្រីកលទ្ធភាពឱ្យបានកាន់តែច្រើន ធ្វើយ៉ាងណាឱ្យមានតម្លាភាពប្រសើរឡើង ។
បើតាមឯកឧត្ដមកិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធានសមាគមអតីតយុទ្ធជនកម្ពុជា និងជាអនុប្រធាននិងជាអគ្គលេខាធិការសមាគមអតីតយុទ្ធជនកម្ពុជា បានឱ្យដឹងថា ចំពោះការសាងសង់ស្នាក់ការសមាគមអតីតយុទ្ធជនកម្ពុជា គឺបានទទួលជំនួយសាងសង់ ហើយក៏កំពុងសាងសង់នៅតាមខេត្តមួយចំនួនហើយ រួមមាន៖ បាត់ដំបង បន្ទាយមានជ័យ (សាងសង់រួចរាល់) កំពង់ចាម កំពង់ឆ្នាំង (កំពុងសាសសង់) ព្រះវិហារ សៀមរាប ត្បូងឃ្មុំ កំពង់ធំ ស្វាយរៀង កំពង់ស្ពឺ និងកំពត។ ក្រៅពីនេះ នៅសល់១២ខេត្តទៀតដែលមិនទាន់មានដីសម្រាប់សាងសង់ស្នាក់ការ និងការឧបត្ថម្ភសាងសង់ស្នាក់ការនៅឡើយ ៕
