រដ្ឋមន្ត្រីយុត្តិធម៌ បំភ្លឺបញ្ជាក់ផ្លូវច្បាប់ក្នុងករណីបាញ់សាហាវឃោឃៅ សម្លាប់មនុស្ស២នាក់ និងរបួស២នាក់ ដែលប្រព្រឹត្តដោយជនល្មើសឈ្មោះ ស្រី ស៊ីណា
ភ្នំពេញ៖ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ បានបំភ្លឺបញ្ជាក់ពីចំណាត់ការផ្លូវច្បាប់លើការបាញ់ប្រហារដ៏សាហាវឃោឃៅ ប្រព្រឹត្តដោយជនល្មើសឈ្មោះ ស្រី ស៊ីណា បានបណ្ដាលឱ្យមនុស្ស២នាក់ស្លាប់ និងរបួស២នាក់ ករណីនេះត្រូវចោទប្រកាន់ក្នុងសំណុំរឿង២ដាច់ដោយឡែកពីគ្នា ដោយបច្ចុប្បន្នចៅក្រមស៊ើបសួរកំពុងបន្តនីតិវិធីនៃស៊ើបអង្កេតស្រាវជ្រាវ។
នាឱកាសអញ្ជើញធ្វើសន្និសីទសារព័ត៌មានពាក់ព័ន្ធករណីឃាតកម្ម ប្រព្រឹត្តដោយជនល្មើសឈ្មោះ ស្រី ស៊ីណា នារសៀលថ្ងៃទី២៦ ខែមិថុនា ឆ្នាំ២០២៤ ឯកឧត្តមឧបនាយករដ្ឋមន្ត្រី កើត រិទ្ធ ថ្លែងថា យើងមិនអាចនិយាយថា (ជនល្មើសឈ្មោះ ស្រី ស៊ីណា ជាប់ទោស) ប៉ុន្មានឆ្នាំទេ ពីព្រោះរឿងនេះមិនទាន់កាត់ទោស (កាត់ក្ដីព្រោះ) ចៅក្រមកំពុងដំណើរការស៊ើបអង្កេតស្រាវជ្រាវក្នុងករណីនេះ (ឃាតកម្ម) ឱ្យស៊ីជម្រៅ។ យើងមិនអាចផ្ដន្ទាទោសលើសពីច្បាប់កំណត់នោះទេ។
ឯកឧត្តមឧបនាយករដ្ឋមន្ត្រី បានថ្លែងបន្តថា យើងគ្មានជម្រើសអ្វីក្រៅពីការអនុវត្តច្បាប់ឱ្យបានម៉ឺងម៉ាត់ ដើម្បីធានាថា ច្បាប់អនុវត្តតឺងរ៉ឹង ម៉ឺងម៉ាត់ និងដោយត្រឹមត្រូវ។
យោងតាមសេចក្ដីប្រកាសព័ត៌មានរបស់ក្រសួងយុត្តិធម៌ផ្សាយកាលពីថ្ងៃទី២៣ ខែមិថុនា បានបញ្ជាក់ថាការបំបែកសំណុំរឿងជាពីររបស់តំណាងអយ្យការអមសាលាដំបូងរាជធានីភ្នំពេញ ព្រមទាំងច្បាប់នៃព្រះរាជាណាចក្រកម្ពុជា ជនល្មើសឈ្មោះ ស្រី ស៊ីណា នឹងត្រូវកាត់ទោសដោយសាលក្រមចំនួន២ សម្រាប់សំណុំរឿងពីរដាច់ដោយឡែកពីគ្នា ហើយអាចប្រឈមនឹងការផ្តន្ទាទោសដាក់ពន្ធនាគាររហូតដល់១៥ឆ្នាំ ក្នុងសំណុំរឿងនីមួយៗ។ ជនល្មើសឈ្មោះ ស្រី ស៊ីណា ភេទប្រុស អាយុ ៥០ឆ្នាំ ត្រូវបានសមត្ថកិច្ចចាប់ខ្លួនបានភ្លាមៗ និងនៅថ្ងៃទី២២ ខែមិថុនា ឆ្នាំ២០២៤ អយ្យការអមសាលាដំបូងរាជធានីភ្នំពេញបានសម្រេចចោទប្រកាន់ជនល្មើសឈ្មោះ ស្រី ស៊ីណា ក្នុងសំណុំរឿងពីរដាច់ដោយឡែកពីគ្នា៖ ទី(១)-បទឃាតកម្ម តាមមាត្រា ១៩៩ នៃក្រមព្រហ្មទណ្ឌ ដែលអាចជាប់ទោសដាក់ពន្ធនាគារពី ១០ឆ្នាំ ទៅ ១៥ឆ្នាំ, ទី(២)-បទប៉ុនប៉ងឃាតកម្ម (ឬបទឃាតកម្មមិនបានសម្រេច) តាមមាត្រា ២៧ និង មាត្រា ១៩៩ នៃក្រមព្រហ្មទណ្ឌ ដែលអាចជាប់ទោសដាក់ពន្ធនាគារពី ១០ឆ្នាំ ទៅ ១៥ឆ្នាំ និងទី(៣)-បទប្រើប្រាស់អាវុធដោយខុសច្បាប់ តាមមាត្រា ២០ នៃច្បាប់ស្តីពីការគ្រប់គ្រងអាវុធ គ្រឿងផ្ទុះ និង គ្រាប់រំសេវ ដែលអាចជាប់ទោសដាក់ពន្ធនាគារពី ៦ខែ ទៅ ២ឆ្នាំ ៕
