ឯកឧត្តមបណ្ឌិត ហេង សុផាន់ណារិទ្ធ ដឹកនាំកិច្ចប្រជុំត្រួតពិនិត្យលើរបាយការណ៍ស្ថានភាពហិរញ្ញវត្ថុ នៃការអនុវត្តរបបសន្ដិសុខសង្គម

ភ្នំពេញ៖ ដោយទទួលបានការអនុញ្ញាតពីសំណាក់ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នារសៀលថ្ងៃទី២៦ ខែមិថុនា ឆ្នាំ២០២៤នេះ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. និងជាប្រធានក្រុមការងារកិច្ចការច្បាប់ នៃ ប.ស.ស. បានដឹកនាំកិច្ចប្រជុំត្រួតពិនិត្យលើរបាយការណ៍ស្ថានភាពហិរញ្ញវត្ថុរបស់ ប.ស.ស. លើចំណូល-ចំណាយក្នុងប្រតិបត្តិការនៃការអនុវត្តរបបសន្ដិសុខសង្គម តាមរយៈការផ្ដល់តាវកាលិកជូនសមាជិក ប.ស.ស. ការទូទាត់ថ្លៃចំណាយដែលសមាជិក ប.ស.ស. បានទៅទទួលសេវានៅតាមមូលដ្ឋានសុខាភិបាល និងរកដំណោះស្រាយរួមផ្សេងៗទៀត ដើម្បីរក្សាបាននូវនិរន្ដរភាពហិរញ្ញវត្ថុរបបសន្ដិសុខសង្គម។

ក្នុងកិច្ចប្រជុំនេះ ឯកឧត្តមបណ្ឌិតប្រធានអង្គប្រជុំ បានដាក់សំណើដល់អង្គភាពជំនាញ នៃ ប.ស.ស. ត្រូវពិនិត្យ និងពិភាក្សាផ្លាស់ប្តូរយោបល់គ្នាទៅវិញទៅមកលើស្ថានភាព និងទិដ្ឋភាពអនុវត្តការងារជាក់ស្ដែង ដើម្បីផ្ដល់ជាធាតុចូលសំខាន់ៗទាក់ទងនឹងស្ថានភាពចំណូល-ចំណាយ ដើម្បីជាលទ្ធផលរួមដែលអាចទទួលយកបាន ក្នុងការយកទៅវិភាគ ក៏ដូចជារៀបចំរបាយការណ៍ស្ថានភាពហិរញ្ញវត្ថុរបស់អង្គភាពទាំងមូល ប្រកបដោយភាពត្រឹមត្រូវ និងប្រសិទ្ធភាព។

កិច្ចប្រជុំពិភាក្សាពេញមួយរសៀលនេះ ជាកិច្ចពិភាក្សាដ៏សំខាន់មួយ ដែលអាចស្វែងរកបញ្ហាប្រឈម និងមតិយោបល់រួមពីអង្គភាពនីមួយៗនៃ ប.ស.ស. ដើម្បីយកមកវិភាគលើប្រភពនៃហានិភ័យហិរញ្ញវត្ថុ និងអាចស្វែងរកដំណោះស្រាយបានទាន់ពេលវេលា និងក្លាយជារបាយការណ៍មួយត្រឹមត្រូវ ច្បាស់លាស់ ដែលថ្នាក់ដឹកនាំអាចពិនិត្យ និងកែតម្រូវស្ថានភាពមិនប្រក្រតីដែលជាហានិភ័យ ដើម្បីធានាបាននូវការអនុវត្តគោលនយោបាយនានារបស់រាជរដ្ឋាភិបាល៕