នាយករដ្ឋមន្ត្រី ហ៊ុន ម៉ាណែត៖ រដ្ឋាភិបាល មិនលូកដៃក្នុងវិស័យឯកជន ពិសេសធានាសុខសន្ដិភាព សម្រាប់វិស័យឯកជន

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានថ្លែងថា រាជរដ្ឋាភិបាល មិនលូកដៃនៅក្នុងវិស័យឯកជន ហើយកត្តាធំបំផុតនោះ រាជរដ្ឋាភិបាល ធានាសុខសន្ដិភាព សម្រាប់វិស័យឯកជន។

នាឱកាសអញ្ជើញសំណេះសំណាល និងពិសាភោជនាហារសាមគ្គីមហាគ្រួសារសហគ្រាសធុនតូច មធ្យម និងសិប្បកម្មកម្ពុជា ក្នុងឱកាសអបអរទិវាសហគ្រាសធុនមីក្រូតូច និងមធ្យម នាថ្ងៃទី២៧ ខែមិថុនា ឆ្នាំ២០២៤ សម្ដេចធិបតី ហ៊ុន ម៉ាណែត បញ្ជាក់ថា «រដ្ឋាភិបាល មិនលុកដៃនៅក្នុងវិស័យឯកជន រដ្ឋាភិបាល មិនចាំបាច់មានក្រុមហ៊ុនដែលរដ្ឋ គ្រប់គ្រងនោះទេ។ ពិតណាស់ យើងមានគ្រឹះស្ថានសិក្សាសាធារណៈរបស់រដ្ឋមួយចំនួន យើងមានសហគ្រាសសាធារណៈរបស់រដ្ឋមួយចំនួន ដូចជា៖ EDC រដ្ឋករទឹក ដែលយើងគ្រប់គ្រងមួយចំនួនទេ»។

សម្ដេចធិបតីមានប្រសាសន៍ថា វិស័យសំខាន់ជាច្រើន មានវិស័យឯកជនសឹងទាំងអស់ ក្នុងការគ្រប់គ្រង។ អ្វីដែលរាជរដ្ឋាភិបាល ត្រូវធានានោះ ទីមួយ វិស័យឯកជនខ្លាចជាងគេបំផុត គឺស្ថេរភាពត្រូវបាត់បង ទាំងវិនិយោគិនមក វិនិយោគស្រុកខ្មែរ និងវិនិយោគិនក្នុងស្រុក បើត្រូវការអភិវឌ្ឍបន្ថែម ត្រូវគិតអំពីស្ថេរភាព។

សម្ដេចធិបតី លើកឡើងថា ដូច្នេះការធានាធំមួយរបស់រាជរដ្ឋាភិបាល សម្រាប់វិស័យឯកជន គឺការធានាសុខសន្ដិភាព សន្ដិសុខ និងសេ្ថរភាពសង្គម ដែលត្រូវការពារឲ្យបានដាចខាត ទោះនៅក្នុងតម្លៃណាក៏ដោយ ដើម្បីធានាសិទ្ធសេរីភាពរបស់វិស័យឯកជន នៅក្នុងការដើរតួនាទី ក្នុងការបង្កើតការងារ និងជួយជំរុញជីវភាពរស់នៅរបស់ប្រជាពលរដ្ឋ។ សម្ដេច បន្ដថា បញ្ហា ទីពីរ នោះ គឺថែរក្សាសេ្ថរភាពម៉ាក្រូសេដ្ឋកិច្ច ៕