ឯកឧត្ដម ចាន់ ស៊ីណាត បើកសិក្ខាសាលាស្ដីពីគម្រោងកិច្ចសហប្រតិបត្តិការរវាងក្រុមហ៊ុន Sterila និង Meteo France International ក្នុងការបំពាក់ឧបករណ៍នៅមជ្ឈមណ្ឌលជាតិគ្រប់គ្រងទិន្នន័យធនធានទឹក និងឧតុនិយម

ភ្នំពេញ៖ នៅទីស្ដីការក្រសួង នាថ្ងៃទី២៧ ខែមិថុនា ឆ្នាំ២០២៤ នេះ ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក និងឧតុនិយម បានអញ្ជើញជាអធិបតីភាពដឹកនាំសិក្ខាសាលាស្តីពីគម្រោងកិច្ចសហប្រតិបត្តិការរវាងក្រុមហ៊ុន Sterela និងទីភ្នាក់ងារឧតុនិយមបារាំងអន្តរជាតិ (Meteo France International) ក្នុងការបំពាក់ឧបករណ៍នៅមជ្ឈមណ្ឌលជាតិគ្រប់គ្រងទិន្នន័យធនធានទឹក និងឧតុនិយម។

សូមជម្រាបថា សិក្ខាសាលានេះមានការអញ្ជើញចូលរួមពី ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ អគ្គនាយក លោក លោកស្រី អគ្គនាយករង ប្រធាន អនុប្រធាននាយកដ្ឋាន ប្រធាន អនុប្រធានមន្ទីរធនធានទឹក និងឧតុនិយមរាជធានី-ខេត្តទាំងអស់ ព្រមទាំងលោក លោកស្រីតំណាងទីភ្នាក់ងារឧតុនិយមបារាំងអន្តរជាតិ និងតំណាងក្រុមហ៊ុន Sterila ជាច្រើនរូបផងដែរ។

ឯកឧត្តមរដ្ឋលេខាធិការបានគូសបញ្ជាក់ថា សិក្ខាសាលានាពេលនេះបានរៀបចំឡើងក្រោមកិច្ចសហការយ៉ាងជិតស្និទ្ធរវាងក្រសួងធនធានទឹក និងឧតុនិយមជាមួយទីភ្នាក់ងារឧតុនិយមបារាំងអន្តរជាតិ និងក្រុមហ៊ុនដំឡើងប្រព័ន្ធរ៉ាដារបស់ប្រទេសបារាំង (Sterela) ដើម្បីធ្វើការផ្សព្វផ្សាយឱ្យបានទូលំទូលាយនិងបង្កើនកិច្ចសហប្រតិបត្តិការឱ្យបានរឹងមាំក្នុងក្របខណ្ឌ័ទូទាំងប្រទេសជាមួយក្រសួង ស្ថាប័នថ្នាក់ជាតិ និងថ្នាក់ក្រោមជាតិ ជាពិសេសជាមួយមន្ទីរធនធានទឹក និងឧតុនិយមគ្រប់រាជធានី-ខេត្ត។

ជាមួយគ្នានេះ ឯកឧត្តមរដ្ឋលេខាធិការបានបញ្ជាក់ថា ការបំពាក់ឧបករណ៍ទំនើបចុងក្រោយនិងបំពាក់ប្រព័ន្ធបច្ចេកវិទ្យាឌីជីថល នៅមជ្ឈមណ្ឌលជាតិគ្រប់គ្រងទិន្នន័យធនធានទឹក និងឧតុនិយម គឺមានសារសំខាន់ខ្លាំងណាស់ សម្រាប់ការគ្រប់គ្រងទឹក ប្រើប្រាស់ទឹក បញ្ជាទឹក និងឧតុនិយម ប្រកបដោយស័ក្តិសិទ្ធិភាព និងប្រសិទ្ធភាព ដូចបណ្តាប្រទេសនៅក្នុងតំបន់ និងនៅលើពិភពលោក៕