ទស្សនកិច្ចសិក្សា និងសកម្មភាព បណ្ដុះបណ្ដាលអន្តរជាតិអភិវឌ្ឍសមត្ថភាពប្រចាំឆ្នាំ២០២៤ ស្ដីពីការអប់រំបែបឌីជីថល ជូនដល់លោកគ្រូ អ្នកគ្រូកម្ពុជា
ភ្នំពេញ៖ លោកជំទាវ គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា នាថ្ងៃទី២៨ ខែមិថុនា ឆ្នាំ២០២៤ បានអញ្ជើញដឹកនាំគ្រូបង្រៀនកម្ពុជា ចូលរួមវគ្គបណ្ដុះបណ្ដាលអន្តរជាតិអភិវឌ្ឍសមត្ថភាពប្រចាំឆ្នាំ២០២៤ ព្រមទាំងជួបពិភាក្សាការងារ ជាមួយលោក Lee Sung Hwan នាយកវិទ្យាស្ថានស្រាវជ្រាវអប់រំ និងព័ត៌មានទីក្រុងប៊ូសាន ស្ដីពីការលើកកម្ពស់កិច្ចសហប្រតិបត្តិការការអប់រំបែបឌីជីថល។
ក្នុងឱកាសនោះ លោកជំទាវ និងប្រតិភូបានអញ្ជើញទស្សនកិច្ចនៅវិទ្យាស្ថានស្រាវជ្រាវអប់រំ និងព័ត៌មានក្រុងប៊ូសាន និងនៅតាមសាលារៀន ដើម្បីស្វែងយល់ពីបទពិសោធន៍ក្នុងការអប់រំ ដែលអាចអនុវត្តនៅតាមសាលារៀននៅកម្ពុជា ក្នុងគោលដៅប្រែក្លាយជាសាលារៀនឆ្លាតវៃ គ្រូបង្រៀនមានសមត្ថភាពឌីជីថលគ្រប់គ្រាន់ អាចបន្តដឹកនាំសិស្សានុសិស្សឲ្យសម្រេចបាននូវលទ្ធផលការសិក្សាប្រកបដោយគុណភាព ជាពិសេសការកាត់បន្ថយគម្លាតឌីជីថល។
ពិធីបើកវគ្គបណ្ដុះបណ្ដាល បានប្រព្រឹត្តទៅនាថ្ងៃទី២៤ មិថុនា ឆ្នាំ២០២៤ មានការអញ្ជើញចូលរួមដោយ លោក ជ័យ សិទ្ធ អគ្គនាយករងរដ្ឋបាល និងហិរញ្ញវត្ថុ ក្រសួងអប់រំ យុវជន និងកីឡា ប្រធានវិទ្យាស្ថានស្រាវជ្រាវអប់រំ និងព័ត៌មានទីក្រុងប៊ូសាន ថ្នាក់ដឹកនាំ និងសហការីនៃនាយកដ្ឋានបរិវត្តកម្មឌីជីថល ព្រមទាំងលោកគ្រូ អ្នកគ្រូសិក្ខាកាមកម្ពុជា។ សូមជម្រាបថា វគ្គបណ្ដុះបណ្ដាលនេះ បានប្រព្រឹត្តទៅចាប់ពីថ្ងៃទី២៣ដល់ថ្ងៃទី៣០ ខែមិថុនា ឆ្នាំ២០២៤ នៅទីក្រុងប៊ូសាន សាធារណរដ្ឋកូរ៉េ៕
