ឯកឧត្តមកិត្តិសង្គហបណ្ឌិត គន់ គីម ជួបសំណេះសំណាល សាកសួរសុខទុក្ខ និងពិនិត្យមើលស្ថានភាពជីវភាពរស់នៅរបស់បងប្អូនអតីតយុទ្ធជន ក្នុងស្រុកភ្នំក្រវ៉ាញ

ភ្នំពេញ៖ នៅព្រឹកថ្ងៃទី២៩ ខែមិថុនា ឆ្នាំ២០២៤ នេះ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធាន និងជាអគ្គលេខាធិការ ស.អ.ក. បានអញ្ជើញចុះជួបសំណេះសំណាល សាកសួរសុខទុក្ខ និងពិនិត្យមើលស្ថានភាពជីវភាពរស់នៅរបស់បងប្អូនអតីតយុទ្ធជន នៅភូមិប៊ុនរ៉ានីសែនជ័យដំណាក់ត្រយឹង ឃុំព្រងិល ស្រុកភ្នំក្រវ៉ាញ ខេត្តពោធិ៍សាត់។

ឆ្លៀតឱកាសនោះ ឯកឧត្តមកិត្តិសង្គហបណ្ឌិត ក៏បានចុះពិនិត្យវឌ្ឍនភាពកៃការសាងសង់ហេដ្ឋារចនាសម្ព័ន្ធផ្លូវថ្នល់ និងទីតាំងដីសម្បទានដែលរាជរដ្ឋាភិបាលបានផ្តល់ជូនបន្ថែមសម្រាប់បន្តសាងសង់ផ្ទះជូនបងប្អូនអតីតយុទ្ធជនដែលមានជីវភាពលំបាកខ្វះខាត។

ឯកឧត្តមកិត្តិសង្គហបណ្ឌិត បានសម្តែងនូវការកោតសរសើរជូនចំពោះបងប្អូនអតីតយុទ្ធជនដែលបានខិតខំប្រឹងប្រែងដាំដំណាំដាំដុះ ចិញ្ចឹមសត្វ និងប្រកបរបររកស៊ីផ្សេងៗ ដើម្បីជួយទ្រទ្រង់ដល់ជីវភាពរស់នៅឱ្យកាន់តែប្រសើរឡើងថែមមួយកម្រិតទៀត។

ឯកឧត្តមកិត្តិសង្គហបណ្ឌិត បានណែនាំឱ្យសមាគមអតីតយុទ្ធជនខេត្ត ត្រូវពិនិត្យឱ្យបានច្បាស់លាស់អតីតយុទ្ធជន ដែលបានទទួលផ្ទះ ហើយមិនបានមករស់នៅជាអចិន្រ្តៃយ៍ ដើម្បីចាត់វិធានការដកហូតទុកប្រគល់ជូនបងប្អូនអតីតយុទ្ធជនដែលក្រីក្រលំបាក និងមិនមានជម្រកស្នាក់នៅសមរម្យ។

ឯកឧត្តមកិត្តិសង្គហបណ្ឌិត បានថ្លែងអំណរគុណនិងកោតសរសើរជូនចំពោះក្រសួង ស្ថាប័នពាក់ព័ន្ធ ថ្នាក់ដឹកនាំខេត្តក៏ដូចជាអាជ្ញាធរមូលដ្ឋានទាំងអស់ដែលបានខិតខំដោះស្រាយជីវភាពរស់នៅរបស់បងប្អូនអតីតយុទ្ធជន ជាពិសេសក្នុងការរៀបចំហេដ្ឋារចនាសម្ព័ន្ធផ្លូវថ្នល់ សំណង់អាងទឹក អគ្គិសនី ប្រព័ន្ធទឹកស្អាត សម្រាប់ផ្តល់ជូនអតីតយុទ្ធជន ៕