មន្ត្រីជាន់ខ្ពស់ក្រសួងសុខាភិបាល ផ្ដល់អនុសាសន៍ណែនាំ ៨ចំណុច ដើម្បីរៀបចំនូវសារអប់រំសុខភាព ក្នុងវិស័យសុខាភិបាល
ភ្នំពេញ៖ នាថ្ងៃទី១ ខែកក្កដា ឆ្នាំ២០២៤ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល លោកជំទាវវេជ្ជបណ្ឌិតឱ វណ្ណឌីន រដ្ឋលេខាធិការក្រសួងសុខាភិបាល បានដឹកនាំកិច្ចប្រជុំលើកទី៥ ស្ដីពីការអប់រំសុខភាព និងលើកកម្ពស់សុខភាព ក្នុងគោលបំណងធ្វើបច្ចុប្បន្នភាពការងារអប់រំសុខភាព និងកំណត់សារអប់រំសុខភាព។
កិច្ចប្រជុំនេះបានធ្វើឡើងនៅមជ្ឈមណ្ឌលជាតិលើកកំពស់សុខភាព ដោយបានទទួលការអញ្ជើញចូលរួមពីក្រុមការងារជាមន្ត្រីបង្គោលមកពីនាយកដ្ឋាន មជ្ឈមណ្ឌលជាតិ និងកម្មវិធីជាតិ ព្រមទាំងដៃគូរអភិវឌ្ឍវិស័យសុខាភិបាលផងដែរ។
ក្រោមកិច្ចប្រជុំនេះ លោកជំទាវរដ្ឋលេខាធិការបាន ផ្តល់អនុសាសន៍ជម្រុញលើកទឹកចិត្ត បន្តការងារអនុវត្តរួមមាន៖
-ការផលិតសារអប់រំសុខភាពតិចអំបិល តិចខ្លាញ់ តិចស្ករ រួមជាមួយការរំលេចសារអប់រំពីគ្រឿងញៀន ជាស្លាកបញ្ឈតូចៗ និងការណែនាំឱ្យដាក់លើតុពិសារអាហារនៅតាមភោជនីយដ្ឋាននានា បើអាចធ្វើទៅបាន
-ការបន្តកិច្ចខិតខិតខំប្រឹងប្រែង ក្នុងការចាក់ផ្សាយសារអប់រំសុខភាពនៅលើផ្ទាំង LED តាមដងផ្លូវ ទីផ្សា សាលារៀន ទូទាំងរាជធានីខេត្ត
– ការរៀបចំដាក់អាល់កុលលាងដៃនៅគ្រប់បន្ទប់ពិគ្រោះ និងព្យាបាលជំងឺតាមមន្ទីរពេទ្យបង្អែក និងមណ្ឌលសុខភាពនានា
– ការបង្កើតកិច្ចសហការជាមួយ ក្រសួងអប់រំយុវជន និងកីឡា និងកាកបាទក្រហមកម្ពុជា ដើម្បីចូលរួមចែករំលែក និងបង្កើនការផ្សព្វផ្សាយ សារអប់រំសុខភាព
– ការជំរុញពន្លឿនការរៀបចំឡើងវិញនូវក្រុមការងារបច្ចេកទេសផលិតសម្ភារអប់រំសុខភាពប្រឆាំងនឹងជំងឺរបេងនៅមជ្ឈមណ្ឌលជាតិកំចាត់រោគរបេង និងហង់សិន
– ការបង្កើតជា QR Code សម្រាប់ផ្ទុករាល់ឯកសារអប់រំសុខភាពផ្សេងៗ
– ការត្រៀមលក្ខណ:ក្នុងការបើកយុទ្ធនាការអប់រំសុខភាព ប្រយុទ្ធប្រឆាំងនឹងជំងឺគ្រុនឈាម
– ការត្រៀមនូវប្រធានបទអប់រំសុខភាព និងលើកកម្ពស់សុខភាពសម្រាប់ឆ្នាំ ២០២៥
ឆ្លៀតក្នុងឱកាសនេះ លោកជំទាវរដ្ឋលេខាធិការ ក៏បានសម្ដែងនូវការកោតសរសើរដល់ក្រុមការងារទាំងអស់ដែលតែងតែរិះរកនូវគំនិតច្នៃប្រឌិតថ្មីៗ ក្នុងការរៀបចំនូវសារអប់រំសុខភាពឱ្យកាន់តែមានភាពទាក់ទាញ និងផ្ដល់នូវប្រសិទ្ធិភាពខ្ពស់។
