ឯកឧត្តម ប៊ិន ត្រឈៃ៖ សិក្ខាសាលាផ្សព្វផ្សាយ លទ្ធផលនៃការផ្លាស់ប្តូរឆ្នាំគោលគណនេយ្យជាតិឆ្នាំ២០១៤ រៀបចំឡើងក្នុងគោលបំណងសំខាន់ចំនួន២
ភ្នំពេញ៖ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ បានលើកឡើងថា បើកសិក្ខាសាលាផ្សព្វផ្សាយស្តីពីលទ្ធផលចុងក្រោយការផ្លាស់ប្តូរឆ្នាំគោល គណនេយ្យជាតិឆ្នាំ២០១៤ រៀបចំឡើងក្នុងគោលបំណងសំខាន់ៗចំនួន២ ។
ក្នុងឱកាសអញ្ជើញបើកសិក្ខាសាលាផ្សព្វផ្សាយ ស្តីពីលទ្ធផលចុងក្រោយការផ្លាស់ប្តូរឆ្នាំគោល គណនេយ្យជាតិឆ្នាំ២០១៤ នាថ្ងៃទី២ ខែកក្កដា ឆ្នាំ២០២៤នេះ ឯកឧត្តម ប៊ិន ត្រឈៃ បានបង្ហាញសេចក្តីសោមនស្សរីករាយជាអនេក ដោយបានចូលរួមជាអធិបតីក្នុងសិក្ខាសាលា ផ្សព្វផ្សាយស្តីពីលទ្ធផលនៃការផ្លាស់ប្តូរឆ្នាំគោលគណនេយ្យជាតិឆ្នាំ២០១៤ នាពេលនេះ។
ឯកឧត្ដមក៏បានសម្តែង នូវការស្វាគមន៍យ៉ាងកក់ក្តៅចំពោះវត្តមាន ឯកឧត្តម លោកជំទាវ លោក លោកស្រី ថ្នាក់ដឹកនាំ មន្ត្រីរាជការ តំណាងអង្គទូត ដៃគូអភិវឌ្ឍ ភ្ញៀវជាតិ និងអន្តរជាតិ ទាំងអស់ដែលបានឆ្លៀតពេលវេលាដ៏មមាញឹកចូលរួម ក្នុងអង្គសិក្ខាសាលាផ្សព្វផ្សាយដ៏មានសារៈសំខាន់នេះ។
ឯកឧត្ដមរដ្ឋមន្ត្រីបញ្ជាក់ថា «ខ្ញុំសូមថ្លែងអំណរគុណដល់ក្រុមការងារនៃក្រសួងផែនការ ក្រសួងសេដ្ឋកិច្ចនិងហិរញ្ញវត្ថុ និងភាគី ពាក់ព័ន្ធទាំងអស់ ដែលបានសហការរៀបចំសិក្ខាសាលានេះឡើងក្នុងគោលបំណង ៖ ១) ផ្សព្វផ្សាយលទ្ធ ផលនៃការផ្លាស់ប្តូរឆ្នាំគោលគណនេយ្យជាតិពីឆ្នាំ២០០០ ទៅឆ្នាំ២០១៤ ដែលសម្រេចបាន និងបច្ច័យនៃ ការផ្លាស់ប្តូរឆ្នាំគោល ទៅលើសង្គម-សេដ្ឋកិច្ចកម្ពុជា ដែលក្រុមការងារនឹងបង្ហាញជូននាពេលបន្តិចទៀត ២) ការរៀបចំ និងទទួលយកធាតុចូលពី បណ្តាក្រសួង-ស្ថាប័នក្នុងរាជរដ្ឋាភិបាល និងដៃគូអភិវឌ្ឍ សម្រាប់ត្រៀម ផ្លាស់ប្តូរឆ្នាំគោល ២០១៤ នាពេលខាងមុខឱ្យកាន់តែមានគុណភាពប្រសើរឡើង» ៕
