កាកបាទក្រហមកម្ពុជា រៀបចំកិច្ចប្រជុំស្តីពីការកាត់បន្ថយ និងបន្ស៊ាំការប្រែប្រួលអាកាសធាតុ និងអព្យាក្រឹតកាបូន ឆ្នាំ២០៥០

ភ្នំពេញ៖ នៅព្រឹកថ្ងៃទី៣ ខែកក្កដា ឆ្នាំ២០២៤ កាកបាទក្រហមកម្ពុជា រៀបចំកិច្ចប្រជុំស្តីពីការកាត់បន្ថយ និងបន្ស៊ាំការប្រែប្រួលអាកាសធាតុ និងអព្យាក្រឹតកាបូន ឆ្នាំ២០៥០ ក្រោមអធិបតីភាព លោកជំទាវ ពុំ ចន្ទីនី អគ្គលេខាធិការកាកបាទក្រហកម្ពុជា ដោយមានការអញ្ជើញចូលរួមពីសំណាក់លោកជំទាវអគ្គលេខាធិការរងទី១ ឯកឧត្តមអគ្គលេខាធិការរងទី២ ថ្នាក់ដឹកនាំ និងមន្ត្រីនៃទីស្នាក់ការកណ្តាលសរុបប្រមាណ ៣០នាក់។ ក្នុងកិច្ចប្រជុំនេះ ក៏បានការអញ្ជើញចូលរួមសម្របសម្រួលបច្ចេកទេសពីសំណាក់បណ្ឌិត ហាក់ ម៉ៅ ប្រធាននាយកដ្ឋានប្រែប្រួលអាកាសធាតុ នៃក្រសួងបរិស្ថាន និងសហការីផងដែរ។

កិច្ចប្រជុំធ្វើឡើងក្នុងគោលបំណងក្នុងការកំណត់ចំនុចដៅ (Targets) និងសូចនាករ (Indicators) នៅក្នុងធម្មនុញអាកាសធាតុ និងបរិស្ថាន (Climate and Environment Charter) ដឹកនាំដោយសហព័ន្ធអន្តរជាតិ (IFRC) និងគណៈកម្មាធិការអន្តរជាតិ(ICRC) ដែលកាកបាទក្រហមកម្ពុជា បានចុះហត្ថលេខាក្នុងខែតុលា ឆ្នាំ២០២២កន្លងមក លើការប្តេជ្ញាចិត្តជាសកល ៧ចំណុច ដើម្បីឆ្លើយតបនឹងវិបត្តិធ្ងន់ធ្ងរដែលបង្កដោយការប្រែប្រួលអាកាសធាតុ និងបរិស្ថាន។ ម្យ៉ាងវិញទៀតកិច្ចប្រជុំនេះមានសារៈសំខាន់ក្នុងការធ្វើរបាយការណ៍វឌ្ឍនភាព ឆ្លើយតបនិងសេចក្តីថ្លែងការណ៍រាជធានីភ្នំពេញ ដែលកាកបាទក្រហមកម្ពុជាធ្វើជាម្ចាស់ផ្ទះនៃកិច្ចប្រជុំថ្នាក់ដឹកនាំលើកទី២០ នៃសមាគមនជាតិកាកបាទក្រហម អឌ្ឍចន្ទក្រហម ភូមិភាគអាស៊ីអាគ្នេយ៍ក្នុងការឈានឆ្ពោះទៅអព្យាក្រឹតកាបូនក្នុងឆ្នាំ២០៥០។

នាឱកាសនោះ លោកជំទាវ ពុំ ចន្ទីនី អគ្គលេខាធិការ បានថ្លែងអំណរគុណយ៉ាងជ្រាលជ្រៅចំពោះបណ្ឌិត ហាក់ ម៉ៅ និងសហការី ឆ្លៀតពេលដ៏មានតម្លៃចូលរួមក្នុងកិច្ចប្រជុំនេះ ព្រមទាំងបានធ្វើបទបង្ហាញដ៏មានសារៈសំខាន់ អំពីការកាត់បន្ថយ និងបន្ស៊ាំទៅនឹងការប្រែប្រួលអាកាសធាតុ ផលប៉ះពាល់អន្តរវិស័យដូចជា កសិកម្ម ធន់ធានទឹក តំបន់ឆ្នេរ ហេដ្ឋារចនាសម្ព័ន្ឋ សុខាភិបាល ព្រៃឈើ និងជីវៈចម្រុះ និងយុទ្ឋសាស្រ្តរយៈពេលវែងប្រកបដោយ អព្យាក្រឹតកាបូនឆ្នាំ២០៥០ ជូនដល់ថ្នាក់ដឹកនាំ និងមន្ត្រីកាកបាទក្រហមកម្ពុជា ដើម្បីចូលរួមអនុវត្តសកម្មភាពកាត់បន្ថយនិងបន្ស៊ាំការប្រែប្រួលអាកាសធាតុ។

សូមជម្រាបជូនថា កាកបាទក្រហកម្ពុជា ដែលមានសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ជាព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានបង្កើតឱ្យមានឧទ្យានកាកបាទក្រហមកម្ពុជាចំនួន២កន្លែងគឺនៅខេត្តសៀមរាប និងខេត្តកំពង់ស្ពឺ ដែលមានដើមឈើរាប់ពាន់ដើម ដែលអាចចូលរួមកាត់បន្ថយការកើនឡើងនៃឧស្ម័នផ្ទះកញ្ចក់ ការប្រែប្រួលអាកាសធាតុ បានមួយផ្នែក។ ជាក់ស្តែងនៅថ្ងៃទី៦និងទី៧ ខែកក្កដា ឆ្នាំ២០២៤ ខាងមុខ ថ្នាក់ដឹកនាំ មន្ត្រី អ្នកស្ម័គ្រចិត្ត យុវជនកាកបាទក្រហកម្ពុជា សរុប២៨៣នាក់ ចូលរួមដាំឈើ១០០០ដើមនៅខេត្តសៀមរាប ដើម្បីអបអរសាទរខួប៧២ រុក្ខទិវា ៩ កក្កដា ២០២៤ ក្រោមប្រធានបទ ព្រៃឈើ ដើម្បីប្រជាជន និងការអភិវឌ្ឍដោយចិរភាពផងដែរ ៕