សម្តេចធិបតី និងលោកជំទាវបណ្ឌិត បន្តឧបត្ថម្ភអង្ករ ជូនដល់តំបន់ប្រតិបត្តិការសឹករងពោធិ៍សាត់ យោធិភូមិភាគទី៥

ភ្នំពេញ៖ នាថ្ងៃទី៤ ខែកក្កដា ឆ្នាំ២០២៤ ឯកឧត្តមនាយឧត្តមសេនីយ៍ គឹម ប៊ុនថាន រដ្ឋមន្ត្រីប្រតិភូអមនាយករដ្ឋមន្ត្រី បាននាំយកអង្ករ ដែលជាអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ទៅប្រគល់ជូនតំបន់ប្រតិបត្តិការសឹករងពោធិ៍សាត់ យោធភូមិភាគទី៥ នៃបញ្ជាការដ្ឋានកងទ័ពជើងគោក តាមរយ:ឧត្ដមសេនីយ៍ត្រី ហេង សូម៉ាយ៉ាត្រា មេបញ្ជាការតំបន់ប្រតិបត្តិការសឹករងពោធិ៍សាត់។

សុខទុក្ខរបស់កងកម្លាំង គឺជាអាទិភាពដែលសម្តេចធិបតី និងលោកជំទាវបណ្ឌិត បានគិតគូរ ហើយផ្តល់នូវការឧបត្ថម្ភគាំទ្រជាប្រចាំ និងទៀងទាត់ បានបង្ហាញច្បាស់ ពីសារៈសំខាន់នៃជីវភាពរស់នៅប្រចាំថ្ងៃ ដើម្បីបំពេញបេសកកម្មក្នុងការបម្រើជាតិ និងប្រជាជនមានភាពសកម្ម និងប្រសិទ្ធភាពខ្ពស់បំផុត ៕