អភិបាលខេត្តក្រចេះ ណែនាំឱ្យរៀបចំទូងស្គរ បាញ់កាំជ្រួច ដើម្បីអបអរសាទរ ក្នុងពេលបើកការដ្ឋានព្រែកជីកហ្វូណនតេជោ
ភ្នំពេញ៖ ឯកឧត្តម វ៉ា ថន អភិបាលខេត្តក្រចេះ និងជាប្រធានគណៈបញ្ជាការឯកភាពរដ្ឋបាលខេត្ត បានណែនាំឱ្យអាជ្ញាធរក្រុង ស្រុក មន្ទីរអង្គភាព គ្រប់វត្តអារាមនានា ជុំវិញខេត្ត រៀបចំទូងស្គរ បាញ់កាំជ្រួច និងគ្រប់ទីកន្លែងដែលអាចធ្វើទៅបាន ដើម្បីអបអរសាទរ ក្នុងពេលបើកការដ្ឋានព្រែកជីកហ្វូណនតេជោ ដើម្បីបង្ហាញពីការគាំទ្រ លើកទឹកចិត្ត នូវការអនុវត្តគម្រោងព្រែកជីកហ្វូណន តេជោរបស់កម្ពុជា នៅថ្ងៃទី៥ ខែសីហា ឆ្នាំ២០២៤ខាងមុខនេះ។
ឯកឧត្ដមបានណែនាំបែបនេះ នៅរសៀលថ្ងៃទី៤ ខែកក្កដា ឆ្នាំ២០២៤ ក្នុងពេលអញ្ជើញដឹកនាំកិច្ចប្រជុំបូកសរុបលទ្ធផលការងារប្រចាំឆមាសទី១ និងលើកទិសដៅការងារ របស់រដ្ឋបាលខេត្តក្រចេះ។
នៅក្នុងកិច្ចប្រជុំនេះដែរ ឯកឧត្តម វ៉ា ថន អភិបាលខេត្តបានណែនាំឱ្យត្រៀមរៀបចំពិធីអុំទូក នៅដងទន្លេទីរួមខេត្ត ដើម្បីអបអរសាទរពិធីបុណ្យអុំទូក អកអំបុក បណ្តែតប្រទីប សំពះព្រះខែ ឆ្នាំ២០២៤ផងដែរ៕
