ថ្នាក់ដឹកនាំសាខាកាកបាទក្រហមកម្ពុជា ខេត្តកំពង់ឆ្នាំង ចុះសួរសុខទុក្ខពលរដ្ឋរងគ្រោះដោយពុលត្រីកំពត ៧នាក់ នៅមន្ទីរពេទ្យបង្អែកខេត្ត

ភ្នំពេញ៖ ឯកឧត្ដម ស៊ុន សុវណ្ណារិទ្ធិ ប្រធានគណៈកម្មាធិការសាខា នាថ្ងៃទី ៥ ខែកក្កដា ឆ្នាំ២០២៤ នេះ បានចាត់បញ្ជូន លោកជំទាវ ប៊ន សុភី អនុប្រធានអចិន្ត្រៃយ៍គណៈកម្មាធិការសាខា រួមដំណើរដោយ ឯកឧត្ដម ប្រាក់ វ៉ុន លេខាធិការគណៈកម្មាធិការសាខា ក្រុមប្រតិបត្តិសាខា និងអនុសាខា ក.ក្រ.ក ស្រុករលាប្អៀរ បានចុះសួរសុខទុក្ខប្រជាពលរដ្ឋ ៧នាក់ (កុមារ ៣នាក់) រងគ្រោះដោយពុលត្រីកំពត នៅភូមិដំបូកកកោះ ឃុំភ្នំក្រាំងដីមាស ស្រុករលាប្អៀរ ខេត្តកំពង់ឆ្នាំង បច្ចុប្បន្នកំពុងសម្រាកព្យបាលនៅមន្ទីរពេទ្យបង្អែកខេត្តកំពង់ឆ្នាំង។

ក្នុងឱកាសនោះដែរ លោកជំទាវអនុប្រធានអចិន្ត្រៃយ៍គណៈកម្មាធិការសាខា បានពាំនាំការសួរសុខទុក្ខពីសំណាក់ឯកឧត្ដម ស៊ុន សុវណ្ណារិទ្ធិ ប្រធានគណៈកម្មាធិការសាខា តែងតែយកចិត្តទុកដាក់ដល់ប្រជាពលរដ្ឋគ្រប់រូប ដែលរងគ្រោះដោយគ្រោះថ្នាក់ផ្សេងៗ និងបន្តផ្ដាំផ្ញើរាល់ពេលបរិភោគចំណីអាហារ ត្រូវពិនិត្យឱ្យបានហ្មត់ចត់ ចៀសវាងកើតមានបញ្ហាដូចករណីនេះជាដើម ។

ជាមួយគ្នានេះដែរ សាខា និងអនុសាខា ក.ក្រ.ក ស្រុករលាប្អៀរ បានឧបត្ថម្ភថវិកា មួយចំនួនដល់អ្នករងគ្រោះម្នាក់ៗ រួមមាន ៖ ថវិកា ១៥០,០០០រៀល (ថវិកាសាខា ១០០,០០០និង ថវិកាអនុសាខា ៥០,០០០)និងឧបត្ថម្ភដល់អ្នកជំងឺជិតខាង ៦នាក់ ក្នុង១នាក់ ៥០,០០០រៀល (ថវិកាសាខា និងអនុសាខា) ៕