លោក ពូទីន៖ រុស្ស៊ីចាប់ផ្តើមផលិតកាំជ្រួចរយៈចម្ងាយមធ្យមជាការឆ្លើយតបនឹងសកម្មភាពរបស់អាមេរិក
អាស្តាណា៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានឲ្យដឹងកាលពីថ្ងៃព្រហស្បតិ៍ថា ប្រទេសរុស្ស៊ីបានត្រៀមខ្លួនរួចជាស្រេចក្នុងការចាប់ផ្តើមផលិតមីស៊ីលរយៈចម្ងាយខ្លី និងមធ្យម ដើម្បីឆ្លើយតបទៅនឹងសកម្មភាពរបស់សហរដ្ឋអាមេរិក។
ប្រធានាធិបតីរុស្ស៊ី បានបញ្ជាក់ថា ពាក់ព័ន្ធនឹងការដកសហរដ្ឋអាមេរិកចេញពីសន្ធិសញ្ញាកងកម្លាំងនុយក្លេអ៊ែរកម្រិតមធ្យម (INF) និងការប្រកាសថាពួកគេចាប់ផ្តើមផលិត យើងក៏ពិចារណាផងដែរថា យើងមានសិទ្ធិចាប់ផ្តើមស្រាវជ្រាវ អភិវឌ្ឍ និងផលិត នៃមីស៊ីលទាំងនេះ។
លោកបានបន្តថា រុស្ស៊ីកំពុងអនុវត្តការស្រាវជ្រាវ និងការអភិវឌ្ឍន៍បែបនេះ ហើយត្រៀមខ្លួនជាស្រេចក្នុងការចាប់ផ្តើមផលិត ដោយលោកបានបន្ថែមថា ទីក្រុងមូស្គូអាចធ្វើសកម្មភាពស្រដៀងគ្នានេះ ក្នុងករណីដែលមីស៊ីលរយៈចម្ងាយខ្លី និងមធ្យមរបស់សហរដ្ឋអាមេរិកត្រូវបានដាក់ពង្រាយនៅក្នុងតំបន់ណាមួយនៃពិភពលោក។
សហរដ្ឋអាមេរិក និងសហភាពសូវៀតបានចុះហត្ថលេខាលើសន្ធិសញ្ញា INF ក្នុងឆ្នាំ១៩៨៧ ដែលហាមប្រាមការកាន់កាប់ អភិវឌ្ឍ និងសាកល្បងមីស៊ីលបាញ់ពីដីដែលមានចម្ងាយពី ៥០០-៥,៥០០គីឡូម៉ែត្រ។
នៅឆ្នាំ២០១៩ សហរដ្ឋអាមេរិកបានប្រកាសជាផ្លូវការអំពីការដកខ្លួនចេញពីសន្ធិសញ្ញា INF។
