គណៈប្រតិភូយុវជនគណបក្សប្រជាជនកម្ពុជាថ្នាក់កណ្តាល ចូលជួបសម្តែងការគួរសមជាមួយ លេខាធិការរងគណ:កម្មាធិការបក្សកុម្មយនីស្តចិននៃខេត្តយូនណាន
ភ្នំពេញ៖ នៅល្ងាចថ្ងៃព្រហស្បតិ៍ ១២រោច ខែជេស្ឋ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៤ ខែកក្កដា ឆ្នាំ២០២៤ ឯកឧត្តមបណ្ឌិត ថេង ចន្ទ័សង្វារ សមាជិកគណៈកម្មាធិការកណ្តាល និងជាអនុប្រធានយុវជនគណបក្សថ្នាក់កណ្តាល បានដឹកនាំគណៈប្រតិភូយុវជនគណបក្សប្រជាជនកម្ពុជាថ្នាក់កណ្តាល ចូលជួបសម្តែងការគួរសមជាមួយ ឯកឧត្តម Shi Yugang លេខាធិការរងគណ:កម្មាធិការបក្សកុម្មយនីស្តចិននៃខេត្តយូនណាន។
ឯកឧត្តមលេខាធិការរងបាន លើកឡេីងអំពីទំនាក់ទំនងនិងកិច្ចសហប្រតិបត្តិការរវាងប្រទេសទាំងពីរ ជាប្រទេសដែលមានទីតាំងភូមិសាស្ត្រជិតគ្នា និងមានទំនាក់ទំនងផ្សារភ្ជាប់គ្នាតាំងពីអតីតកាលនិងបានបន្តផ្សារភ្ជាប់ទំនាក់ទំនងនេះរហូតមកដល់បច្ចុប្បន្ននេះ។
ឯកឧត្តមក៏បានធ្វេីការចែករំលែកបទពិសោធន៍ក្នុងការងារដឹកនាំនិងអភិវឌ្ឍខេត្តយូនណានក្រោមគំនិតផ្តួចផ្តើមរបស់ ឯកឧត្តម Xi Jinping អគ្គលេខាបក្សកុម្មុយនីស្តចិន ដែលបាននាំឱ្យប្រទេសនេះ ទទួលបានជោគជ័យក្នុងការកាត់បន្ថយភាពក្រីក្របានយ៉ាងឆាប់រហ័ស។
ជាមួយគ្នានេះដែរ ឯកឧត្តមបណ្ឌិតប្រធានគណៈប្រតិភូ បានថ្លែងអំណរគុណចំពោះការទទួលបដិសណ្ឋារកិច្ចរបស់បក្សកុម្មនុយនីស្តចិន និងបានគាំទ្រចំពោះប្រសាសន៍លើកឡើងរបស់ ឯកឧត្តមលេខាធិការបក្សខេត្តយូនណានទំនាក់ទំនងកម្ពុជា-ចិន។
ឯកឧត្តមបណ្ឌិតប្រធានគណៈប្រតិភូ ក៏បានលើកឡើងផងដែរថា ក្រោមការដឹកនាំរបស់គណបក្សប្រជាជនកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ប្រធានគណបក្សជាស្នូល បានដឹកនាំនិងអភិវឌ្ឍប្រទេសកម្ពុជាបានរីកចម្រើនគួរជាទីមោទនៈ។
បច្ចុប្បន្នសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បាននិងកំពុងបន្តដឹកនាំក្រោមគំនិតផ្តួចផ្តើមរបស់ សម្តេចតេជោប្រធានគណបក្សដែលជាបិតាសន្តិភាព បិតាបង្រួបបង្រួមជាតិ និងជាអគ្គមគ្គុទេសក៏ឆ្នើមរបស់ប្រជាជាតិកម្ពុជា ៕
