ឯកអគ្គរដ្ឋទូតថ្មីរបស់ចិនប្រចាំកម្ពុជា បានមកកាន់លើទឹកដីកម្ពុជាហើយ

ភ្នំពេញ៖ លោក Wang Wenbin ឯកអគ្គរដ្ឋទូតថ្មីនៃប្រទេសចិនប្រចាំប្រទេសកម្ពុជា បានអញ្ជើញមកដល់ព្រលានយន្តហោះអន្តរជាតិភ្នំពេញហើយនាយប់នាថ្ងៃទី៥ ខែកក្កដា ឆ្នាំ២០២៤ ដើម្បីបំពេញបេសកកម្មលើកដំបូងក្នុងអាណ្ណត្តិរបស់ខ្លួន បន្ទាប់ពីលោក Wang Wentien (វ៉ាង វិនធាន) បញ្ចប់អាណត្តិបេសកកម្មកាលពីប៉ុន្មានខែមុននេះ។

បន្ទាប់ពីអញ្ជើញដល់ទឹកដីកម្ពុជាមិនបានមួយម៉ោង លោក Wang Wenbin បានអញ្ជើញថ្លែងសន្ទរកថាខ្លីមួយអំពីគោលជំហរ និងការប្តេជ្ញាចិត្តរបស់លោកក្នុងការទទួលភារកិច្ចថ្មីនៅប្រទេសកម្ពុជាផងដែរ។

លោក Wang Wenbin គឺជាអ្នកនយោបាយ និងអ្នកការទូតចិន ដែលលោកជាអតីតអ្នកនាំពាក្យក្រសួងការបរទេស និងជាអនុប្រធាននាយកដ្ឋានព័ត៌មាននៃក្រសួងការបរទេស និងជាសមាជិកនៃបក្សកុម្មុយនិស្តចិន។

លោក Wang គឺជាអ្នកនាំពាក្យទី៣២ នៃក្រសួងការបរទេសចិន ចាប់តាំងពីការបង្កើតតំណែងនេះឡើងកាលពីឆ្នាំ១៩៨៣។

លោក Wang Wenbin ក៏ធ្លាប់កាន់តំណែងជាឯកអគ្គរដ្ឋទូតចិនប្រចាំប្រទេសទុយនេស៊ីពីឆ្នាំ២០១៨ ដល់ឆ្នាំ២០២០ និងធ្លាប់បំពេញកិច្ចការងារនៅស្ថានទូតចិនប្រចាំប្រទេសម៉ូរីស និងប្រទេសសេណេហ្គាល់៕