មន្ត្រីជាន់ខ្ពស់ក្រសួងសុខាភិបាល ដឹកនាំកិច្ចប្រជុំពិនិត្យលើសំណើសុំ ធ្វើការសិក្សាស្រាវជ្រាវសុខភាព ដែលទាក់ទងនឹងមនុស្ស
ភ្នំពេញ៖ នាថ្ងៃទី៥ ខែកក្កដា ឆ្នាំ២០២៤ គណៈ កម្មាធិការជាតិក្រមសីលធម៌សម្រាប់ការស្រាវជ្រាវដែលទាក់ទងនឹងមនុស្ស បានរៀបចំកិច្ចប្រជុំពេញអង្គដែលធ្វើឡើងជារៀងរាល់២ខែម្តង ក្រោមអធិបតីភាព ឯកឧត្តមសាស្រ្តាចារ្យ ឡឹម តារា រដ្ឋលេខាធិការក្រសួងសុខាភិបាល និងជាប្រធានគណៈកម្មាធិការជាតិក្រមសីលធម៌ និងសមាជិក សមាជិការរបស់គណៈកម្មាធិការ រួមទាំងក្រុមលេខាធិការ ដើម្បីធ្វើការពិនិត្យលើពិធីសារនៃការស្រាវជ្រាវដែលបានដាក់មកគណៈកម្មាធិការក្នុងខែឧសភានិងមិថុនា២០២៤កន្លងមក។
ឯកឧត្តមសាស្រ្តាចារ្យប្រធាន បានស្វាគមន៍សមាជិក សមាជិការ និងក្រុមលេខានឹងរំលឹកពី តួនាទីនឹងភារកិច្ចរបស់សមាជិក/សមាជិការគណៈកម្មាធិការនិងក្រុមលេខានៅក្នុងការពិនិត្យលើការសិក្សាស្រាវជ្រាវដែលទាក់ទងនឹងមនុស្សនៅកម្ពុជា។
ឯកឧត្តមប្រធានក៏បានណែនាំអោយក្រុមការងារស្វែងរកធាតុចូលថ្មីៗបន្ថែមទៀតសំដៅចូលរួមបង្កើនគុណភាពនៃការស្រាវជ្រាវជាពិសេសលើផ្នែកវេជ្ជសាស្រ្តនៅកម្ពុជា។
អង្គប្រជុំបានធ្វើការពិនិត្យលើពិធីសារនៃការសិក្សាស្រាវជ្រាវចំនួន២០ ដោយឈរលើគោលការណ៍ក្រមសីលធម៌ គោលការណ៍វិទ្យាសាស្រ្តសម្រាប់ការស្រាវជ្រាវ និងតំរូវការនៃវិស័យសុខាភិបាលកម្ពុជា។
