ឯកឧត្តម ចាយ បូរិន អនុញ្ញាតឲ្យតំណាងអង្គការយូនីសេហ្វប្រចាំកម្ពុជា ចូលជួបសមែ្តងការគួរសម និងពិភាក្សាការងារ
ឯកឧត្តម ចាយ បូរិន រដ្ឋមន្រ្តីក្រសួងធម្មការនិងសាសនា អនុញ្ញាតឲ្យលោកវេជ្ជបណ្ឌិត វីល ផាក(Will Parks )តំណាងអង្គការយូនីសេហ្វប្រចាំកម្ពុជា និងសហការី ចូលជួបសមែ្តងការគួរសម និងពិភាក្សាការងារ នៅទីស្តីការក្រសួងនាព្រឹកថ្ងៃទី០៨ ខែកក្កដា ឆ្នាំ ២០២៤
លោកវេជ្ជបណ្ឌិត វីល ផាក(Will Parks )មានប្រសាសន៍ជម្រាបជូនឯកឧត្តម រដ្ឋមន្រ្តី អំពីសកម្មភាពការងារនាពេលកន្លងមក ដោយអង្គការយូនីសេហ្វប្រចាំកម្ពុជា ទទួលបានការអនុញ្ញាតពីរាជរដ្ឋាភិបាលកម្ពុជាក្នុងការចូលរួមចំណែកអភិវឌ្ឍន៏កម្ពុជា តាមរយៈសកម្មភាពការងារសង្គមដោយផ្តោតទៅលើកុមារជាចំបង និងដើម្បីពិភាក្សាអំពីការប្តេជ្ញាចិត្ត និងការគាំទ្ររបស់ អង្គការយូនីសេហ្វចំពោះក្រសួងធម្មការ និងសាសនា ក្រោមក្របខណ្ឌនៃកិច្ចសហប្រតិបត្តិការ កម្មវិធីថ្មី ២០២៤-២០២៨ រវាងយូនីសេហ្វ និងរាជរដ្ឋាភិបាលកម្ពុជា។
ក្នុងនោះ លោកវេជ្ជបណ្ឌិត បានមានប្រសាសន៍បន្តថា គោលបំណងសំខាន់នៃជំនួបនាឱកាសនេះមាន៣ចំណុចសំខាន់៣គឺ
១.ស្នើរសុំឯកឧត្តម រដ្ឋមន្រ្តី ពិភាក្សាជាមួយក្រសួងពាក់ព័ន្ធ បញ្ចូលកម្មវិធីបង្កាអំពើហឹង្សាលើកុមារចូលក្នុងកម្មវិធីសិក្សារបស់ក្រសួងអប់រំ ។
២.ពិភាក្សាលើភាពសុខដុមនីយកម្មលើគ្រប់សាសនានៅកម្ពុជា ដូចជាការពង្រីកកម្មវិធីការពារកុមារតាមវត្តអារាម ពង្រីក កម្មវិធីជាមួយអ្នកដឹកនាំសាសនាផ្សេងទៀត ដូចជាឥស្លាមសាសនា-មូស្លីម និងគ្រិស្ទបរិស័ទ ទិវា អធិស្ឋាន និងសកម្មភាពសម្រាប់កុមារ។
៣.ស្នើរសុំ ឯកឧត្តម រដ្ឋមន្រ្តី ពិចារណាដាក់សំណើរទៅរដ្ឋាភិបាលបង្កើត ទិវាបួងសួងដើម្បីកុមារ ថ្នាក់ជាតិក្នុងប្រតិទិន។
ជាការឆ្លើយតប ឯកឧតម ចាយ បូរិន បានមានប្រសាសន៍ថា ក្រសួងធម្មការនិងសាសនា បានចូលជាសមាជិកគាំពារសង្គម ក្នុងនោះការងាររបស់ក្រសួងមិនត្រឹមតែគ្រប់គ្រងសាសនាទាំងអស់នៅកម្ពុជាឲ្យមានភាពសុខដុមនីយកម្មប៉ុណ្ណោះទេ គឺបានចូលរួមចំណែកជាមួយរាជរដ្ឋាភិបាលបណ្តុះនៅមូលធនមនុស្សប្រកបដោយ គុណធម៌ សីលធម៌ តាមរយៈការសហការជាមួយក្រសួងអប់រំ យុវជន និងកីឡា ក្នុងការដាក់បញ្ចូលកម្មវិធីសមាធិអប់រំផ្លូវចិត្តក្នុងកម្មវិធីសិក្សារបស់ក្រសួងដល់សិស្សានុសិស្សរួចមកហើយ ។
ឯកឧត្តម រដ្ឋមន្រ្តី បានបញ្ជាក់ផងដែរថា ចំពោះសំណើររបស់លោកវេជ្ជបណ្ឌិតដែលបានលើកឡើងនាឱកាសនេះ ក៏ជាផែនការសកម្មភាពរបស់ក្រសួងកំពុងអនុវត្ត និងកំពុងប្រមូលនូវធាតុចូលសំខាន់ៗជាមុនសិន មុននឹងលើកផែនការជូនទៅរាជរដ្ឋាភិបាលជាអ្នកអនុម័ត។
ក្នុងឱកាសនេះ ឯកឧត្តម ចាយ បូរិន
សូមស្វាគមន៏ផងដែរចំពោះបណ្តាអង្គការ ស្ថាប័ន និង សមាគមន៍នានា ដែលមានបំណងចូលរួមអភិវឌ្ឍន៍ប្រទេសកម្ពុជាតាមរយៈក្រសួងធម្មការនិងសាសនា ហើយបានធ្វើសកម្មភាពការងារសមស្របទៅនឹងច្បាប់ដែលរាជរដ្ឋាភិបាលកម្ពុជាបានកំណត់ ព្រមទាំងសូមជូនពរដល់លោកវេជ្ជបណ្ឌិត Will Parks តំណាងអង្គការយូនីសេហ្វប្រចាំកម្ពុជា និងសហការី ជួបតែសុខសុវត្ថិភាព និង សម្រេចគ្រប់ភារកិច្ចការងារបន្តទៀត ៕
