អភិបាលខេត្តឧត្ដរមានជ័យ៖ យើងខ្ញុំទាំងអស់គ្នា នឹងព្យាយាមឱ្យអស់ពីលទ្ធភាព ក្នុងការដោះស្រាយរាល់សំណើសំណូមពររបស់ជាពលរដ្ឋ

ភ្នំពេញ៖ ឯកឧត្ដម មាន ចាន់យ៉ាដា អភិបាលខេត្តឧត្ដរមានជ័យ នាថ្ងៃទី៩ ខែកក្កដា ឆ្នាំ២០២៤ បានអញ្ជើញចូលរួមវេទិកាសាធារណៈរបស់ក្រុមការងាររាជរដ្ឋាភិបាលចុះមូលដ្ឋាន ខេត្តឧត្តរមានជ័យ ក្រោមអធិបតីភាពឯកឧត្តមកិត្តិសង្គហបណ្ឌិត គន់ គីម ប្រធានក្រុមការងាររាជរដ្ឋាភិបាល ចុះជួយខេត្តឧត្តរមានជ័យ ។

វេទិកាសាធារណៈនេះ មានការអញ្ជើញចូលរួមពីអ្នកតំណាងរាស្រ្ត សមាជិកក្រុមការងាររាជរដ្ឋាភិបាលចុះមូលដ្ឋានខេត្ត ក្រុមប្រឹក្សាខេត្ត គណៈអភិបាលខេត្ត មន្ទីរអង្គភាពនានាជុំវិញខេត្ត កងកម្លាំងទាំងបីប្រភេទ សិស្សានុសិស្ស និងប្រជាពលរដ្ឋចំនួនប្រមាណ៥០០នាក់។

ថ្លែងក្នុងឱកាសនោះឯកឧត្ដម មាន ចាន់យ៉ាដា អភិបាលខេត្តឧត្ដរមានជ័យ បានមានប្រសាសន៍ថា «ក្នុងនាមគណៈអភិបាលខេត្ត យើងខ្ញុំទាំងអស់គ្នានឹងព្យាយាមឱ្យអស់ពីលទ្ធភាព ក្នុងការដោះស្រាយរាល់សំណើសំណូមពររបស់បងប្អូនប្រជាពលរដ្ឋរបស់យើង»។

ជាមួយគ្នានោះឯកឧត្ដមអភិបាលខេត្ត ក៏បានអរគុណចំពោះវត្តមានបងប្អូនរបស់យើងដែលបានឆ្លៀតពេលវេលាដ៏មានតម្លៃ ចូលរួមក្នុងវេទិកាសាធារណៈនាថ្ងៃនេះ សូមប្រសិទ្ធិពរជ័យសិរីមង្គល វិបុលសុខគ្រប់ប្រការ កុំបីឃ្លៀងឃ្លាតឡើយ ៕