មេបញ្ជាការដ្ឋានទ័ពពិសេស អញ្ជើញចុះត្រួតពិនិត្យការងារសាងសង់នៅ សាលាហ្វឹកហ្វឺនទ័ពពិសេសតេជោសែនឱរ៉ាល់
ភ្នំពេញ៖ នៅព្រឹកថ្ងៃទី១០ ខែកក្កដា ឆ្នាំ២០២៤ ឯកឧត្តម ឧត្តមសេនីយ៍ទោ ស៊ុំ សំណាង មេបញ្ជាការ បញ្ជាការដ្ឋានទ័ពពិសេស កងទ័ពជើងគោក បានដឹកនាំកម្លាំងជំនាញអញ្ជើញចុះត្រួតពិនិត្យការងារសាងសង់នៅសាលាហ្វឹកហ្វឺនទ័ពពិសេសតេជោសែនឱរ៉ាល់ ដែលមានទីតាំងស្ថិតក្នុងភូមិសាស្ត្រ ភូមិដូង ឃុំតាសាល ស្រុកឱរ៉ាល់ ខេត្តកំពង់ស្ពឺ។
លោកវរសេនីយ៍ឯក សុខ នូសាន្ត នាយកសាលាហ្វឹកហ្វឺនទ័ពពិសេសបានបញ្ជាក់ថា សាលាហ្វឹកហ្វឺនទ័ពពិសេសតេជោសែនឱរ៉ាល់មានពីរទីតាំង ទីតាំងទី១ គឺសាលាហ្វឹកហ្វឺនជំនាញឯកទេសលោតឆត្រ និងទីតាំងទី២ សាលាហ្វឹកហ្វឺនកុម្ម៉ង់ដូ។
លោកវរសេនីយ៍ឯក សុខ នូសាន្តបានបន្តថា សំណង់អគារនៅសាលាហ្វឹកហ្វឺនឆត្រយោងដែលកំពុងដំណើរការសាងសង់មានចំនួន ២ខ្នង ក្នុងនោះអគារស្នាក់នៅរបស់គ្រូ ១ខ្នង អំណោយដ៏ថ្លៃថ្លារបស់សម្តេចមហាបវធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា សាងសង់បាន៩០% និង១ខ្នងទៀត អំណោយរបស់ឯកឧត្តម វ៉ី សំណាង អតីតៈអភិបាល នៃគណៈអភិបាលខេត្តកំពង់ស្ពឺ សាងសង់បាន ៤០% ។
ចំពោះអគារសាលាហ្វឹកហ្វឺនកុម្ម៉ង់ដូតេជោសែន មានចំនួន ៦ខ្នង អំណោយដ៏ថ្លៃថ្លារបស់សម្តេចមហាបវធិបតី ហ៊ុន ម៉ាណែត មានអគារស្នាក់នៅកងអនុសេនាតូចទី១ សាងសង់បាន ៨៥% អគារស្នាក់នៅកងអនុសេនាតូច ទី២ សាងសង់បាន ៧០% អគារស្នាក់នៅកងអនុសេនាតូច ទី៣ សាងសង់បាន ៧០% អគារស្នាក់នៅកងអនុសេនាតូច ទី៤ សាងសង់បាន ៥០% អគារស្នាក់នៅកងអនុសេនាតូច ទី៥ សាងសង់បាន ៤៥% និងអគារស្នាក់នៅកងអនុសេនាតូច ទី៦ សាងសង់បាន ៣០%។
ឯកឧត្តម ឧត្តមសេនីយ៍ទោ ស៊ុំ សំណាង បានក្រើនរំលឹកដល់នាយទាហាន នាយទាហានរង និងពលទាហានជំនាយទងអស់ត្រូតាមដាន និងត្រួតពិនិត្យក្រុមជាងឱ្យបានជាប់ប្រចាំលើលក្ខណៈបច្ចេកទេស ដើម្បីឱ្យសំណង់មានគុណភាព និងប្រើប្រាស់បានយូរអង្វែងតាមស្តង់ដាសំណង់។
ឯកឧត្តម ឧត្តមសេនីយ៍ទោ ស៊ុំ សំណាង ក៏បានចង្អុលបង្ហាញ និងត្រួតពិនិត្យទីតាំងដែលត្រូវសាងសង់សំណង់បន្ត រួមមាន ទីតាំងធ្វើសួនច្បារ តេជោសន្តិភាព ទីតាំងសាងសង់គិលានដ្ឋាន ទីតាំងសាងសង់រោងដាក់រថយន្ត ទីតាំងសាងសង់ផ្ទះបាយ និងទីតាំងសាងសង់អគារប្រឆាំងភេរវកម្ម។ឯកឧត្តម មេបញ្ជាការ ក៏បានឧបត្ថម្ភថវិកាចំនួន ៤លានរៀល ដល់ក្រុមជាង និងនាយទាហាន ពលទាហាន ដែលប្រចាំការនៅទីនោះផងដែរ៕
