រដ្ឋមន្ត្រីក្រសួងការបរទេសកម្ពុជា ទទួលជួបសម្តែងការគួរសមជាមួយ ប្រធានសម្ព័ន្ធនិយោជកហ្រ្វង់កូហ្វូន

ភ្នំពេញ៖ នៅថ្ងៃទី០៩ ខែកក្កដា ឆ្នាំ២០២៤ ឯកឧត្តម សុខ ចិន្តាសោភា ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានទទួលជួបសម្តែងការគួរសមជាមួយ លោក Geoffroy ROUX DE BÉZIEUX ប្រធានសម្ព័ន្ធនិយោជកហ្រ្វង់កូហ្វូន(APF)។

កិច្ចពិភាក្សាបានគ្របដណ្ដប់លើប្រធានបទសំខាន់ៗមួយចំនួន ជាពិសេសសារសំខាន់នៃការចូលរួមរបស់គណៈប្រតិភូជាន់ខ្ពស់កម្ពុជានៅក្នុងកិច្ចប្រជុំកំពូលហ្រ្វង់កូហ្វូនីលើកទី១៩ ក៏ដូចជាព្រឹត្តិការណ៍អមនានា ដែលនឹងប្រព្រឹត្តទៅនៅប្រទេសបារាំងនៅថ្ងៃទី៤ -៥ ខែតុលា ឆ្នាំ២០២៤។

លោក Geoffroy ROUX DE BÉZIEUX បានគោរពអញ្ជើញ ប្រធានគណៈប្រតិភូកម្ពុជា ដើម្បីចូលរួមជាភ្ញៀវកិត្តិយសនៅក្នុងកិច្ចប្រជុំកំពូលសេដ្ឋកិច្ច “Franco Tech” ដែលមានការចូលរួមពីប្រមុខរដ្ឋនិងប្រមុខរដ្ឋាភិបាលផ្សេងទៀត។

លោកក៏បានសម្តែងការប្តេជ្ញាចិត្តក្នុងការចែករំលែកបទពិសោធន៍របស់ប្រទេសបារាំងធ្វើជាម្ចាស់ផ្ទះព្រឹត្តិការណ៍អមនេះ ក្នុងពេលដែលកម្ពុជាជាបេក្ខភាពតែមួយគត់ដើម្បីធ្វើជាម្ចាស់ផ្ទះសម្រាប់រៀបចំកិច្ចប្រជុំកំពូលហ្វ្រង់កូហ្វូនីលើកទី២០ នៅឆ្នាំ២០២៦។

ឯកឧត្តមឧបនាយករដ្ឋមន្ត្រី បានគូសបញ្ជាក់ពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងវិស័យបច្ចេកវិទ្យាឌីជីថល ដែលជាអាទិភាពគន្លឹះទី៥ នៃយុទ្ធសាស្ត្របញ្ចកោណសម្រាប់ការអភិវឌ្ឍន៍ប្រទេស។ កិច្ចពិភាក្សា បានបញ្ចប់ដោយការពិភាក្សាអំពីកិច្ចសហប្រតិបត្តិការនាពេលអនាគត រួមទាំងការផ្លាស់ប្តូរកម្រិតខ្ពស់រវាងប្រទេសបារាំង និងកម្ពុជា៕