រដ្ឋមន្ត្រីក្រសួងសុខាភិបាល ជួបការសំណេះសំណាលជាមួយមន្រ្តីនៃនាយកដ្ឋានសុខភាពផ្លូវចិត្ត និងការបំពានគ្រឿងញៀន
ភ្នំពេញ៖ នាព្រឹកថ្ងៃព្រហស្បតិ៍ ៦រោច ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១១ ខែកក្កដា ឆ្នាំ២០២៤ នៅទីស្តីការក្រសួងសុខាភិបាល ឯកឧត្តមសាស្រ្តាចារ្យ ឈាង រ៉ា បានជួបសំណេះសំណាលជាមួយមន្រ្តីនៃនាយកដ្ឋានសុខភាពផ្លូវចិត្ត និងការបំពានគ្រឿងញៀន ដោយមានការចូលរួមពីឯកឧត្តម រដ្ឋលេខាធិការទទួលបន្ទុក អនុរដ្ឋលេខាធិការ អគ្គនាយក លោក លោកស្រី អគ្គនាយករង ប្រធាននាយកដ្ឋាន អនុប្រធាននាយកដ្ឋាន ប្រធានការិយាល័យ និងអនុប្រធានការិយាល័យ។
ក្នុងនោះ ឯកឧត្តមសាស្រ្តាចារ្យមន្រ្តី បានបង្ហាញពីសារៈសំខាន់ និងអាទិភាពនៃសុខភាពផ្លូវចិត្ត សម្រាប់ប្រជាជនគ្រប់ស្រទាប់ និងបានជម្រុញឱ្យមានការបញ្ជ្រាបការងារសុខភាពផ្លូវចិត្តឱ្យដល់សហគមន៍។
ទន្ទឹមនឹងនេះ ឯកឧត្តមសាស្រ្តាចារ្យរដ្ឋមន្រ្តី បានមានអនុសាសន៍ ចំនួន ១០ ចំនុច ក្នុងនោះមាន៖
១).ត្រូវខិតខំកៀរគរធនធានមនុស្ស និងមធ្យោបាយថែមទៀតកុំឱ្យមានការបែកខ្ញែក
២).ខិតខំធ្វើការបណ្តុះបណ្តាលបន្ថែមទៀត
៣).ត្រូវគិតដល់ការថែទាំសុខភាពបឋម និងធ្វើយុទ្ធនាការឱ្យបានទូលំទូលាយដល់សហគមន៍
៤).ត្រូវបញ្ជ្រាប និងដាក់បញ្ចូលទៅក្នុងកម្មវិធីសុខភាពផ្សេងៗទៀត
៥).ត្រូវខិតខំតាក់តែងគោលនយោបាយប្រកបដោយនវានុវត្តន៍
៦) ត្រូវមានកិច្ចសហការជាមួយដៃគូឱ្យបានច្រើន រួមទាំងកិច្ចសហការក្នុងស្ថាប័នឱ្យមានវិសាលភាពកាន់តែទូលំទូលាយ
៧).ត្រូវស្រង់ និងចងក្រងព័ត៌មាន និងការស្រាវជ្រាវពាក់ព័ន្ធនឹងសុខភាពផ្លូវចិត្ត
៨).ត្រូវគិតគូររៀបចំប្រព័ន្ធនៃការស្តារនីតិសម្បទា រួមទាំងការប្រើបច្ចេកវិជ្ជា
៩).ត្រូវធ្វើការវាយតម្លៃស្ថានភាពឱ្យកាន់តែស៊ីជម្រៅ និងទូលំទូលាយ
១០).យកចិត្តទុកដាក់កិច្ចសហការជាមួយដៃគូពាក់ព័ន្ធ។
ក្នុងឱកាសនេះ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានលើកទឹកចិត្តឱ្យខិតខំបំពេញការងារបន្ថែមទៀត និងក៏បានផ្តាំផ្ញើសួរសុខទុក្ខ ដល់មន្ត្រីសុខាភិបាលទាំងអស់ក្នុងនាយកដ្ឋាន ៕
