អភិបាលខេត្តកំពង់ស្ពឺ អញ្ជើញជួបសំណេះសំណាលជាមួយ ប្រធានសហភាពសហព័ន្ធសហជីព នៅក្នុងខេត្ត

ភ្នំពេញ៖ នាព្រឹកថ្ងៃទី១៥ ខែកក្កដា ឆ្នាំ២០២៤ ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ បានអញ្ជើញជាអធិបតីភាពក្នុងពិធីជួបសំណេះសំណាលជាមួយ ប្រធានសហភាពសហព័ន្ធសហជីព ចំនួន១១ស្ថាប័ន នៅក្នុងខេត្តកំពង់ស្ពឺ។

ពិធីនេះក៏មានការអញ្ជើញចូលរួមពីសំណាក់ លោកអភិបាលរងខេត្ត លោកនាយករដ្ឋបាលសាលាខេត្ត លោក លោកស្រីនាយករងទីចាត់ការសាលាខេត្ត លោកប្រធានមន្ទីរការងារ សមាសភាពសរុបប្រមាណជា២៥រូប នៅសាលប្រជុំ កង ហ៊ាង អគាររដ្ឋបាលសាលាខេត្តកំពង់ស្ពឺ។

កិច្ចប្រជុំជំនួបសំណេះសំណាលនាឱកាសនេះ មានគោលបំណងដើម្បីអោយមានភាពជិតស្និទ្ធ បង្កើនសាមគ្គីភាពរឹតចំណងមិត្តភាព និងរួមចំណែកធ្វើយ៉ាងណារិះរកគ្រប់វិធីដើម្បីសម្រួលដល់បងប្អូនកម្មករកម្មការនីដែលមកបម្រើការងារ នៅតាមបណ្តារោងចក្រសហគ្រាសនានាក្នុងមូលដ្ឋានខេត្តកំពង់ស្ពឺ អោយទទួលបាននូវសិទ្ធិសេរីភាពក្នុងការងារ គោរពសិទ្ធិ ទួលបានប្រាក់កម្រៃសមរម្យ ក្នុងការលើកស្ទួយជីវភាពប្រជាពលរដ្ឋឲ្យកាន់តែប្រសើរឡើងបន្ថែមទៀត ទាំងប្រជាពលរដ្ឋក្នុងខេត្ត និងក្រៅខេត្តកំពង់ស្ពឺផងដែរ ៕