ឯកឧត្ដម មាន ចាន់យ៉ាដា ដឹកនាំមន្ទីរជំនាញពាក់ព័ន្ធចុះពិនិត្យស្ថានភាព និងការអនុវត្តវិធានការកម្ចាត់ដង្កូវហ្វូង ក្នុងភូមិសាស្ត្រស្រុកចុងកាល់

ភ្នំពេញ៖ នាព្រឹកថ្ងៃទី១៥ ខែកក្កដា ឆ្នាំ២០២៤ ឯកឧត្ដម មាន ចាន់យ៉ាដា អភិបាល នៃគណៈអភិបាលខេត្តឧត្តរមានជ័យ បានដឹកនាំមន្ទីរជំនាញពាក់ព័ន្ធចុះពិនិត្យស្ថានភាព និងការអនុវត្តវិធានការកម្ចាត់ដង្កូវហ្វូង ក្នុងភូមិសាស្ត្រស្រុកចុងកាល់ ខេត្តឧត្តរមានជ័យ។

ក្នុងឱកាសនោះ ឯកឧត្តម មាន ចាន់យ៉ាដា អភិបាលខេត្ត បានចែកជូនធុងបាញ់ថ្នាំគ្រប់ឃុំទាំងអស់ក្នុងខេត្តឧត្តរមានជ័យ ដើម្បីទុកជូនភ្នាក់ងារកសិកម្មធ្វើកិច្ចអន្តរាគមន៍ផ្ទាល់បានទាន់ពេលវេលា។

គួរបញ្ជាក់ថា ខេត្តឧត្តរមានជ័យ បានទទួលរងគ្រោះដោយដង្កូវហ្វូងរាតត្បាតដំណាំស្រូវបងប្អូនប្រជាកសិករចំនួន ៣៣គ្រួសារ លើផ្ទៃដីសរុប ៩៥ហិចតា នៅក្នុងឃុំចំនួន៤ នៃស្រុកចុងកាល់។ ជាវិធានការឆ្លើយតបដើម្បីកម្ចាត់ និងទប់ស្កាត់ដង្កូវហ្វូង មន្ទីរកសិកម្ម រុក្ខាប្រមាញ់ និងនេសាទ ខេត្តឧត្តរមានជ័យ បានចុះផ្សព្វផ្សាយបណ្ដុះបណ្ដាលអំពីវិធីសាស្ត្រលាយថ្នាំកម្ចាត់ដង្កូវតាមគោលការណ៍របស់ក្រសួង និងចុះបាញ់ថ្នាំជាក់ស្តែងនៅតាមតំបន់ហានិភ័យទាំង៤ឃុំ ៕