ឧត្តមសេនីយ៍ទោ ឡោ សុខា បើកកិច្ចប្រជុំស្ដីពីលទ្ធផលការអនុវត្តការងារឆមាសទី១ ឆ្នាំ២០២៤ របស់ការិយាល័យចរាចរណ៍ផ្លូវគោក
ភ្នំពេញ៖ នៅព្រឹកថ្ងៃចន្ទ ១០កើត ខែអាសាឍ ឆ្នាំរោង ឆស័ក ព.ស២៥៦៨ ត្រូវនឹងថ្ងៃទី១៥ ខែកក្កដា ឆ្នាំ២០២៤ ស្នងការដ្ឋាននគរបាលខេត្ត បានបើកកិច្ចប្រជុំស្ដីពីលទ្ធផលការអនុវត្តការងារឆមាសទី១ ៦ខែ ដើមឆ្នាំ២០២៤ របស់ការិយាល័យចរាចរណ៍ផ្លូវគោក។
កិច្ចប្រជុំនេះបានប្រពឹត្តធ្វើឡើងក្រោមអធិបតីភាព លោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី ដោយមានការអញ្ជើញចូលរួមពីលោកស្នងការរងទទួលដឹកនាំការងារការិយាល័យនគរបាលចរាចរណ៍ផ្លូវគោក, លោកនាយការិយាល័យនគរបាលចរាចរណ៍ផ្លូវគោក, លោក លោកស្រីនាយនាយរងការិយាល័យនគរបាលចរាចរណ៍ផ្លូវគោក, លោក លោកស្រីនាយផ្នែក នាយរងផ្នែកនិងមន្ត្រីទាំងអស់ចំណុះឱ្យការិយាល័យនគរបាលចរាចរណ៍ផ្លូវគោក, លោកអធិការ នៃអធិការដ្ឋាននគរបាលក្រុង ស្រុកទាំង៥, លោកអធិការរងទទួលការងារចរាចរណ៍ផ្លូវគោកនៃអធិការដ្ឋាននគរបាលក្រុង ស្រុកទាំង៥, លោកលោកស្រីនាយ នាយរងនិងមន្ត្រីផ្នែកសណ្ដាប់ធ្នាប់នៃអធិការដ្ឋានក្រុង ស្រុកទាំង៥ និងលោកនាយនគរបាលប៉ុស្តិ៍រដ្ឋបាលទាំង២១ ផងដែរ។
កក្នុងកិច្ចប្រជុំនេះផងដែរលោកឧត្តមសេនីយ៍ទោ ឡោ សុខា ស្នងការនគរបាលខេត្ត បានណែនាំ និងបានផ្ដល់អនុសាសន៍មួយចំនួនដល់ការិយាល័យចរាចរណ៍ផ្លូវគោកដូចខាងក្រោម៖
ទី១-កងកម្លាំងមន្ត្រីនគរបាលចរាចរណ៍ ទាំងអស់ត្រូវគោរពវិន័យជាចម្បងក្នុងការងារចុះអនុវត្តច្បាប់ចរាចរណ៍ផ្លូវគោក ប្រកបដោយក្រមសីលធម៌គោរពវិន័យ វិជ្ជាជីវៈជាមន្រ្តីនគរបាលជាតិ មុឺងម៉ាត់និងតួនាទីភារកិច្ច និងសុភាពរាបសារអត់ធ្មត់និងរក្សានូវ សេចក្តីថ្លៃថ្នូរបស់កម្លាំងនគរបាលជាតិ ចំពោះប្រជាពលរដ្ឋបន្តការងារចុះផ្សព្វផ្សាយ ជូនដល់ប្រជាពលរដ្ឋទៅតាមបណ្តាទីសាធារណៈ លើការផ្សព្វផ្សាយគោលនយោបាយភូមិឃុំមានសុវត្ថិភាព ឱ្យបានជាប្រចាំនិងមានអព្យាក្រឹត្យភាពលើការងារវាស់វែង ពេលមានគ្រោះថ្នាក់ចរាចរណ៍កើតឡើង ដោយមិនលំអៀងទៅភាគីម្ខាងណាឡើយ។
ទី២-រាល់ការស្លៀកសំលៀកបំពាក់ ឯកសណ្ឋានឱ្យបានសមរម្យសាកសម ជាមន្រ្តីនគរបាលជាតិត្រូវគោរពពេលាវេលា ក្នុងការងារបំពេញភារកិច្ចនិងត្រួតពិនិត្យការបំពាក់សម្ភារ: ឧបករណ៍បច្ចេកទេស ឱ្យបានគ្រប់គ្រាន់បម្រើអោយការអនុវត្តច្បាប់ប្រកបដោយប្រសិទ្ឋភាព សំដៅធ្វើអោយករណីគ្រោះថ្នាក់ចរាចរណ៍កាត់បន្ថយជាអតិបរិមានិងមានកំរិតទាបបំផុត។
ទី៣-មន្ត្រីនគរបាលប៉ុស្តិ៍នគរបាល រដ្ឋបាលទាំងអស់ ត្រូវអនុវត្តវេនប្រចាំបញ្ជា២៤ លើ ២៤ម៉ោង គោរពពេលវេលា ងាយស្រួលដល់ការសម្រួលការងារជូនបងប្អូនប្រជាពលរដ្ឋ។
ទី៤-សូមឱ្យកម្លាំងប៉ុស្តិ៍នគរបាលរដ្ឋបាលទាំងអស់ សុំឱ្យសហការ ជាមួយកម្លាំងអធិការដ្ឋានចុះត្រួតពិនិត្យ តាមតំបន់ងាយរងគ្រោះនារដូវវស្សាចូលមកដល់នេះ នៅតាមទីតាំងមួយចំនួន មានភ្លៀងធ្លាក់ខ្យល់កន្ត្រាក់ ធ្វើឱ្យដួលរលំបាក់បែកលំនៅឋាន ជាពិសេសកម្លាំងប៉ុស្តិ៍នគរបាលការពារតាមតំបន់ខ្សែបន្ទាត់ព្រំដែន តាមទន្លេស្ទឹងនិងដងអូរត្រៀមលក្ខណៈការពារ ឱ្យគ្រប់គ្រាន់ដូចជា៖ ត្រៀមទូក ក្បូន ម៉ូតូ និងស្បៀងអាហារ ។ល។
ជាទីបញ្ចប់ លលោកឧត្តមសេនីយ៍ទោ ស្នងការ ក៏បានជូនពរមន្ត្រីនគរបាលក្រោមឱវាទ ទាំងអស់សូមជួបតែពុទ្ធពរទាំង៤ប្រការគឺ៖ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕
