ឯកឧត្តម មាន ចាន់យ៉ាដា ចុះសួរសុខទុក្ខបងប្អូនកងកម្លាំងឈរជើងតាមបណ្ដោយព្រំដែនចំណុចប្រាសាទតាមាន់ និងប្រាសាទតាក្របី

ភ្នំពេញ៖ នាព្រឹកថ្ងៃទី១៦ ខែកក្កដា ឆ្នាំ២០២៤ ឯកឧត្តម មាន ចាន់យ៉ាដា អភិបាល នៃគណៈអភិបាលខេត្តឧត្តរមានជ័យ បានអញ្ជើញដឹកនាំមន្ទីរជំនាញ និងអង្គភាពពាក់ព័ន្ធជុំវិញខេត្ត ចុះសួរសុខទុក្ខបងប្អូនកងកម្លាំងឈរជើងតាមបណ្ដោយព្រំដែនចំណុចប្រាសាទតាមាន់ និងប្រាសាទតាក្របី ដែលកំពុងប្រចាំការការពារបូរណភាពទឹកដីប្រកបដោយឆន្ទៈមនសិការស្នេហាជាតិខ្ពស់បំផុត។

ក្នុងឱកាសអញ្ជើញចុះសួរសុខទុក្ខ ឯកឧត្តម មាន ចាន់យ៉ាដា បានថ្លែងថា ក្នុងនាមរដ្ឋបាលខេត្តឧត្តរមានជ័យ និងខ្លួនខ្ញុំផ្ទាល់ ខ្ញុំសូមគោរពដឹងគុណ និងកោតសរសើរដោយស្មោះជូនចំពោះកងកម្លាំងគ្រប់ប្រភេទដែលបានលះបង់សាច់ស្រស់ឈាមស្រស់ការពារទឹកដី ហើយយើងខ្ញុំទាំងអស់គ្នាសូមផ្តល់ការគាំទ្រ និងលើកទឹកចិត្តគ្រប់ពេលវេលា។

ជាមួយគ្នានោះ ឯកឧត្តម មាន ចាន់យ៉ាដា ក៏បានអំពាវនាវឲ្យបងប្អូនប្រជាពលរដ្ឋមកទស្សនាប្រាសាទកេរ្តិ៍តំណែលដូនតាយើង “ប្រាសាទតាមាន់ និងប្រាសាទតាក្របី” ហើយរដ្ឋបាលខេត្តឧត្តរមានជ័យ នឹងរៀបចំអ្នកមគ្គុទ្ទេសក៍រង់ចាំជូនបងប្អូនចូលទស្សនាប្រាសាទតាមាន់ និងប្រាសាទតាក្របី ដោយឥតគិតថ្លៃ។

សូមជម្រាបជូនផងដែរថា “ប្រាសាទតាមាន់ និងប្រាសាទតាក្របី” ជាកេរ្តិ៍តំណែលពីដូនតាយើងដែលបានបន្សល់ទុកសម្រាប់កូនចៅជំនាន់ក្រោយ នៅលើទឹកដីខេត្តឧត្តរមានជ័យ ពោរពេញទៅដោយបារមីតេជះខ្លាំងពូកែ ៕