កម្លាំងមូលដ្ឋានកងរាជអាវុធហត្ថក្រុងស្ទឹងត្រែង ឃាត់ខ្លួនជនសង្ស័យម្នាក់ ពាក់ព័ន្ធករណីកាន់កាប់ប្រើប្រាស់អាវុធកែច្នៃដោយខុសច្បាប់
ភ្នំពេញ៖ នាយប់ថ្ងៃទី១៧ ខែកក្កដា ឆ្នាំ២០២៤ ឯកឧត្តម សរ សុពុត្រា អភិបាល នៃគណៈអភិបាលខេត្តស្ទឹងត្រែង បានប្រាប់អង្គភាព Hot News Asia ឲ្យដឹងថា នៅវេលាម៉ោង១៤និង៣៤នាទីរសៀលថ្ងៃទី១៧ ខែកក្កដា កម្លាំងកងរាជអាវុធហត្ថខេត្ត សហការណ៍ជាមួយកម្លាំងមូលដ្ឋានកងរាជអាវុធហត្ថក្រុងស្ទឹងត្រែង ធ្វើការបង្ក្រាបករណីកាន់កាប់ប្រើប្រាស់អាវុធកែច្នៃ (កាំភ្លើងហ្គាស បាញ់គ្រាប់ឃ្លី) ដោយខុសច្បាប់, ករណីលួចកាត់ខ្សែភ្លើង និងករណីប្រើប្រាស់ដោយខុសច្បាប់នូវសារធាតុញៀន។
ឯកឧត្តមអភិបាលខេត្ត បានគូសបញ្ជាក់ទៀតថា ជាលទ្ធផលកម្លាំងមូលដ្ឋានកងរាជអាវុធហត្ថក្រុង បានឃាត់ខ្លួនជនសង្ស័យបានចំនួន០១នាក់ ឈ្មោះ ឆេង ប៊ុនណៃ ភេទប្រុស អាយុ ២៧ឆ្នាំ ជនជាតិខ្មែរ មុខរបរកសិករ បច្ចុប្បន្នរស់នៅចំណុចស្រែសំគង់ ភូមិស្រែពោធិ៍ សង្កាត់ស្រះឫស្សី ក្រុងស្ទឹងត្រែង ខេត្តស្ទឹងត្រែង។
វត្ថុតាងរួមមាន៖ កាំភ្លើងកែច្នៃ (កាំភ្លើងហ្គាស បាញ់គ្រាប់ឃ្លី) ចំនួន០១ដើម ត្រូវជនសង្ស័យវាយបំបាក់មុនសមត្ថកិច្ចទៅដល់។
សូមបញ្ជាក់ថា ដោយបានការសម្របសម្រួលនីតិវិធីពីឯកឧត្តម ព្រះរាជអាជ្ញា នៃអយ្យការអមសាលាដំបូងខេត្តស្ទឹងត្រែង បានឲ្យការិយាល័យជំនាញធ្វើការឃាត់ខ្លួនជនសង្ស័យ ដើម្បីសាកសួរ និងស្វែងរកបក្ខពួកបន្ថែម រួចកសាងសំណុំរឿងបញ្ជូនទៅអយ្យការ ចាត់ការតាមនីតិវិធី ៕
