សម្តេចធិបតី៖ សង្គ្រាមមិនមែន បែកបាក់តែមនុស្សទេ សូម្បីរូបសំណាកបុរាណខ្មែរ ក៏បែកបាក់ដែរ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍ថា សង្គ្រាមមិនមែនធ្វើឲ្យបែកបាក់តែមនុស្សទេ សូម្បីរូបសំណាកបុរាណខ្មែរ ដែលជាព្រលឹងដូនតា ក៏ត្រូវបានបែកបាក់ដែរ ដោយលួចយក ទៅប្រទេសក្រៅ។

សម្ដេចធិបតី បានប្រសាសន៍បែបនេះ ក្នុងឱកាសសម្តេច និងលោកជំទាវបណ្ឌិត អញ្ជើញជាអធិបតីក្នុងពិធីបញ្ចុះបឋមសិលាសាងសង់សារមន្ទីរ សម្ដេចព្រះព្រហ្មរតនមុនី ពិន សែម ក្នុងបរិវេណវត្តរាជបូព៌ ស្ថិតនៅសង្កាត់សាលាកំរើក ក្រុងសៀមរាប ខេត្តសៀមរាប នាព្រឹកថ្ងៃទី១៨ ខែកក្កដា ឆ្នាំ២០២៤នេះ។

សម្ដេចធិបតី ហ៊ុន ម៉ាណែត បានថ្លែងថា រាជរដ្ឋាភិបាលបានបង្កើនកិច្ចគាំពារថែរក្សាសម្បត្តិវប្បធម៌ជាតិ និងប្រាង្គប្រាសាទបុរាណនានាឲ្យបានល្អ គង់វង្ស សម្រាប់កូនចៅខ្មែរជំនាន់ក្រោយតទៅមុខទៀត។

សម្ដេចធិបតី នាយករដ្ឋមន្ត្រី បានថ្លែងបន្ដថា បច្ចុប្បន្ន រាជរដ្ឋាភិបាលបានប្រមូលឡើងវិញ នូវសម្បត្តិវប្បធម៌របស់ខ្មែរពីបរទេស យកមកម្ពុជាវិញ ដែលមានចំនួន ១៥ប្រទេស ស្មើនឹង ១០៩៨ដុំ។ សម្ដេចធិបតីក៏បានថ្លែងអំណរគុណ បណ្ដាប្រទេសនានា ដែលបានប្រគល់រូបសំណាកខ្មែរ មកឲ្យប្រទេសកម្ពុជាវិញ។

សម្តេចធិបតី នាយករដ្ឋមន្ដ្រី ក៏បានទទូចឲ្យរួមគ្នាថែទាំ អភិវឌ្ឍន៍ និងអភិរក្សសម្បត្តិវប្បធម៌ ដែលដូនតាបន្សល់ទុក ដើម្បីទាញផលឲ្យ កាន់តែសម្បូរបែប សម្រាប់បម្រើឲ្យវិស័យទេសចរណ៍។

សម្ដេចធិបតី បានបញ្ជាក់ថា វត្ថុបុរាណខ្មែរ ដែលយកលក់ដេញថ្លៃនៅក្រៅប្រទេស មានតម្លៃរហូតដល់រាប់លានដុល្លារ តែកម្ពុជា ត្រូវតែប្រើប្រាស់គ្រប់លទ្ធភាព ដើម្បីយកមកកម្ពុជាវិញ ៕