សម្ដេចធិបតី បង្ហើបថា សម្តេចបានបញ្ជូនក្រុមការងារពិសេស ចុះពិនិត្យស្ថានភាពទេសចរណ៍ នៅខេត្តសៀមរាប ទាំងដែលអភិបាលខេត្តមិនដឹងខ្លួន

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានបង្ហើបថា ក្រោយមានព័ត៌មានផ្សព្វផ្សាយថា ខេត្តសៀមរាប មិនមានភ្ញៀវទេសចរមកកម្សាន្ត សម្តេចបានបញ្ជូនក្រុមការងារពិសេស ចុះពិនិត្យស្ថានភាពទេសចរណ៍ នៅខេត្តមួយនេះ ទាំងដែលអភិបាលខេត្តមិនដឹងខ្លួនផង។

សម្តេចធិបតី ហ៊ុន ម៉ាណែត បានបង្ហើបបែបនេះ ក្នុងឱកាសដែលសម្តេច និងលោកជំទាវបណ្ឌិត អញ្ជើញជាអធិបតីក្នុងពិធីបញ្ចុះបឋមសិលាសាងសង់សារមន្ទីរ សម្ដេចព្រះព្រហ្មរតនមុនី ពិន សែម ក្នុងបរិវេណវត្តរាជបូព៌ ស្ថិតនៅសង្កាត់សាលាកំរើក ក្រុងសៀមរាប ខេត្តសៀមរាប នៅព្រឹកថ្ងៃទី១៨ ខែកក្កដា ឆ្នាំ២០២៤នេះ។

សម្ដេចធិបតី ហ៊ុន ម៉ាណែត បានថ្លែងថា នៅឆមាសទី១ ឆ្នាំ២០២៤ បើគិតពីភ្ញៀវទេសចរដែលចូលតាមច្រកព្រលានយន្ដហោះអន្តរជាតិ មានចំនួន ៣១ម៉ឺននាក់ បើធៀបនៅឆមាសទី១ ឆ្នាំ២០២៣ មានការកើន ហើយរបាយការណ៍ចំនួនទេសចរណ៍ គឺជាមូលដ្ឋានត្រូវស្វែងយល់។

បន្ថែមពីនេះ សម្តេចធិបតី បានឱ្យដឹងថា សម្តេចតែងតែទទួលបានរបាការណ៍ពីស្ថានភាពភ្ញៀវទេសចរជាតិ និងអន្តរជាតិ ជាប់ជាប្រចាំពីរដ្ឋមន្ត្រីក្រសួងទេសចរណ៍ ព្រមទាំងពីវិស័យឯកជន តាមរយៈការជួបដោយផ្ទាល់។

សម្តេចធិបតី បានអះអាងថា ការបញ្ជូនក្រុមការងារពិសេសចុះផ្ទាល់នៅតាមទីតាំងមានបញ្ហា គឺមិនមែនសម្តេចមិនទុកចិត្តលើមន្ត្រីមូលដ្ឋាននោះទេ ប៉ុន្តែ ត្រូវការផ្ទៀងផ្ទាត់ជាមួយនឹងរបាយការណ៍របស់មន្ត្រីជំនាញ ក៏ដូចជាអាជ្ញាធរមូលដ្ឋានជាដើ។

សម្ដេចធិបតី នាយករដ្ឋមន្ត្រី បានទម្លាយថា សម្ដេចបានចុះដោយផ្ទាល់នៅតំបន់ Pub Street នៅខេត្តសៀមរាប នារាត្រីថ្ងៃទី ១៧ កក្កដា ២០២៤ ដើម្បីស្ដាប់ពីបញ្ហាប្រឈមជាក់ស្ដែងរបស់វិស័យទេសចរណ៍ ពិសេសដើម្បីស្វែងយល់ឱ្យច្បាស់នូវទិន្នន័យភ្ញៀវទេសចរ។

សម្ដេចធិបតី នាយករដ្ឋមន្ត្រី ក៏ណែនាំឱ្យរៀបចំកន្លែងផ្សេងៗ ដើម្បីទាក់ទាញទេសចរណ៍នៅខេត្តសៀមរាប ដូចជាការជិះទូក និងការលេងកម្សាន្ដអចិន្ដ្រៃយ៍។ សម្តេចថាតាមរយៈការសាកសួរអាជីវករ ចាប់ពីខែតុលាតទៅ នឹងមានទេសចរណ៍កើនឡើង ខណៈព័ត៌មាននេះស៉ីសង្វាក់គ្នាជាមួយរបាយការណ៍ដែលអភិបាលខេត្តរាយការណ៍ទៅសម្ដេច។

សម្ដេចធិបតី ក៏បានបង្ហើបថា សម្តេចនឹងជួបជាមួយប្រជាពលរដ្ឋផ្ទាល់ ដែលកំពុងប្រកបអាជីវកម្មនៅតាមហាង ក្រៅតំបន់ផាប់ស្ដ្រីត ដោយមិនជូនដំណឹងជាមុនផងដែរ ៕