សម្ដេចធិបតី ស្នើឲ្យភ្ជាប់តំបន់ទេសចរណ៍សំខាន់ៗពីប្រទេសជិតខាង ដើម្បីហោះហើរត្រង់មកខេត្តសៀមរាប
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានស្នើឲ្យមានការភ្ជាប់ជើងហោះហើរពីតំបន់ទេសចរណ៍សំខាន់ៗពីប្រទេសជិតខាង ដើម្បីហោះហើរត្រង់មកកាន់ខេត្តសៀមរាប។
នាឱកាសអញ្ជើញជាអធិបតីភាព ក្នុងពិធីបញ្ចុះបឋមសិលាសាងសង់សារមន្ទីរ សម្ដេចព្រះព្រហ្មរតនមុនី ពិន សែម ក្នុងបរិវេណវត្តរាជបូណ៌ ស្ថិតនៅសង្កាត់សាលាកំរើក ក្រុងសៀមរាប ខេត្តសៀមរាប នាថ្ងៃទី១៨ ខែកក្កដា ឆ្នាំ២០២៤នេះ សម្ដេចធិបតី ហ៊ុន ម៉ាណែត បានបញ្ជាក់ថា «យើងបានចរចាបើកច្រកជាមួយឥណ្ឌា ហោះទៅ ហោះមក តែយើងក៏ត្រូវយកច្រកពីតំបន់ផ្សេងៗផងដែរ ចឹងបានខ្ញុំទៅម្សិលម្ង៉ៃបានជួបទូតហ្វីលីពីន បានស្នើឱ្យបើកច្រកកោះទេសចរណ៍សេប៊ូ ភ្ជាប់មកខេត្តសៀមរាប បើកពីឡាំងហ្គ្រាវី នៅម៉ាឡេស៉ី មកសៀមរាប ភ្ជាប់ពីកោះចេជូ របស់កូរ៉េ មកសៀមរាប ភ្ជាប់ពីភូកេត របស់ថៃ មកសៀមរាបផ្ទាល់ ហើយយើងក៏ពុងចរចារបន្ថែមទៀត»។
សម្ដេចធិបតី បន្តទៀតថា «យើងនៅតែបន្តចរចាបន្ថែមទៀត ហើយធ្វើយ៉ាងណាកុំចាំបាច់ត្រូវហោះទៅភ្នំពេញសិន ហើយចាំបន្តទៅសៀមរាប យើងត្រូវបើកត្រង់ទៅសៀមរាបតែម្តង។ ឥឡូវនេះយើងបើកជើងមេឃហើយ ដូចនេះយើងត្រូវតែដាក់គោលដៅទេសចរណ៍ឱ្យបានច្រើនបន្ថែមទៀត ដើម្បីទាក់ទាញភ្ញៀវទេសចរ»។
សម្ដេចធិបតី ក៏បានណែនាំឲ្យសិក្សាកាត់បន្ថយតម្លៃរបស់ចំណតយន្ដហោះ ក្នុងនោះបើសិនយន្តហោះណាអាចដឹកបានភ្ញៀវទេសចរលើសពី៨០ភាគរយ នឹងបញ្ចុះតម្លៃឱ្យកាន់ទាបបន្ថែមទៀត។ ជាមួយគ្នានោះនៅរដូវកាល ទេសចរណ៍ទាប បើសិនមានយន្តហោះថ្មីមក នឹងជួយបន្ថែមទៀតដើម្បីឱ្យតម្លៃយន្តហោះចុះចតកាន់តែថោក ហើយធ្វើឱ្យតម្លៃសំបុត្រយន្តហោះត្រឡប់ទៅវិញកាន់តែថោកផងដែរ។
សម្ដេចធិបតី ហ៊ុន ម៉ាណែត បានបន្ថែមថា រដ្ឋនឹងកាត់បន្ថយអ្វីដែលអាចធ្វើទៅបាន ហើយរដ្ឋសុខចិត្តខាតចំណូលមួយចំនួន ដើម្បីធ្វើយ៉ាងណាឱ្យមានភ្ញៀវទេសចរចូលមកឱ្យបាន៕
