នាយកដ្ឋាននគរបាលព្រហ្មទណ្ឌ កំពុងស្រាវជ្រាវតាមចាប់ជនស៊ីវិល ដែលអះអាងជាកម្លាំងនគរបាលជាតិ

ភ្នំពេញ៖ បន្ទាប់ពីមានការជជែកវែកញែកគ្នាពាសពេញបណ្ដាញសង្គម ជុំវិញវីដេអូដែលបង្ហាញពីសកម្មភាពរបស់យុវជន២នាក់ ជិះប្រដេញតាមឃាត់ខ្លួនប្រជាពលរដ្ឋតាមដងផ្លូវ ដោយបានអះអាងថា ពួគេជាកម្លាំងនគរបាលជាតិ នៃក្រសួងមហាផ្ទៃ កាលពីយប់ថ្ងៃទី១៧កក្កដា នៅតាមបណ្ដោយផ្លូវសហព័ន្ធរុស្ស៊ី ស្ថិតក្នុងខណ្ឌសែនសុខ ពេលនេះ សមត្ថកិច្ចជំនាញកំពុងធ្វើការស្រាវជ្រាវតាមចាប់ជនទាំងនោះមកសាកសួរ។

បើតាមការឱ្យដឹងពីផេកផ្លូវការរបស់នាយកដ្ឋាននគរបាលព្រហ្មទណ្ឌ នៅរសៀលថ្ងៃទី១៨ ខែកក្កដា ឆ្នាំ២០២៤ នេះ ឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ បានថ្លែងថា បន្ទាប់ពីទទួលបានព័ត៌មាននេះ លោកបានបញ្ជាឱ្យសមត្ថកិច្ចជំនាញរបស់នាយកដ្ឋាន ចុះធ្វើការស្រាវជ្រាវលើករណីនេះបន្ទាន់ និងរកឃើញថា៖ ក្នុងចំណោមជនស៊ីវិលទាំងនោះ មានម្នាក់ជាមន្ត្រីនគរបាលរបស់នាយកដ្ឋាននគរបាលព្រហ្មទណ្ឌ “មិនមានក្នុងរូប” ដែលនៅពេលនេះ នាយកដ្ឋានកំពុងធ្វើការសួរនាំតាមនីតិវិធីជំនាញ។ ប៉ុន្ដែមនុស្ស២នាក់ផ្សេងទៀត ដែលពាក់កាតមានសញ្ញានគរបាលព្រហ្មទណ្ឌ មិនមែនជាមន្ត្រីនគរបាលបម្រើការងារនៅនាយកដ្ឋានឡើយ។

ជាមួយគ្នានេះ ឧត្តមសេនីយ៍ឯក ង៉េង ជួ បានបន្ថែមថា ទោះជាយ៉ាងណា ករណីនេះ នាយកដ្ឋាននគរបាលព្រហ្មទណ្ឌ កំពុងបន្ដធ្វើការស្រាវជ្រាវយ៉ាងយកចិត្តទុកដាក់ និងស្វែករកអ្នកពាក់ព័ន្ធ ព្រមទាំងដើមចមនៃហេតុការណ៍នេះ និងសូមថ្លែងអំណរគុណចំពោះការផ្ដល់ព័ត៌មានពីសាធារណជន និងអ្នកសារព័ត៌មានទាំងអស់៕