រដ្ឋមន្រ្តីក្រសួងធម្មការ៖ សៀមរាបជាខេត្តមានសក្តានុពល ក្នុងការអភិរក្សវិស័យសទេសចរណ៍ សាសនា ក្នុងដែនដីសម្បត្តិវប្បធម៌មនុស្សជាតិ ពោរពេញដោយអរិយធម៌ វប្បធម៌ និងបេតិកភណ្ឌ 

ភ្នំពេញ៖ ក្នុងឱកាស អញ្ជើញសំណេះសំណាលនិងសួរសុខទុក្ខ មន្ត្រីរាជការនៃមន្ទីរធម្មការនិងសាសនាខេត្តសៀមរាបនាព្រឹកថ្ងៃទី១៨ ខែកក្កដា ឆ្នាំ២០២៤ ឯកឧត្តម ចាយ បូរិន រដ្ឋមន្រ្តីក្រសួងធម្មការនិងសាសនា ថ្លែងថា ខេត្តសៀមរាបជាខេត្តមានសក្តានុពល ក្នុងការអភិរក្សវិស័យទេសចរណ៍សាសនាក្នុងដែនដីសម្បត្តិវប្បធម៌មនុស្សជាតិ ដែលពោរពេញដោយអរិយធម៌ វប្បធម៌ និងបេតិកភណ្ឌ។

លោក វណ្ណ ប៊ុនណា ប្រធានមន្ទីរធម្មការនិងសាសនាខេត្តសៀមរាប បានជម្រាបជូន ឯកឧត្តម រដ្ឋមន្រ្តី អំពីវឌ្ឍនភាពការងាររបស់មន្ទីរក្នុងការអនុវត្តកន្លងមក និងជូនអំពីស្ថានភាពសាសនាចំនួន៥ ដែលកំពុងធ្វើសកម្មភាពនៅទូទាំងខេត្ត សៀមរាប  រួមមាន ព្រះពុទ្ធសាសនា៩៨.៨៥% , ឥស្លាមសាសនា០.៥៦% , គ្រិស្តសាសនា ០.៥៥% , ព្រះពុទ្ធសាសនា មហាយាននិងសាសនាបាហៃ មានចំនួនតិចតួច ។

នាឱកាសនេះលោក ប្រធានមន្ទីរ បានជម្រាបជូន ឯកឧត្តម រដ្ឋមន្រ្តី អំពី បញ្ហាប្រឈមមួយចំនួន និងគោរពស្នើរសុំឯកឧត្តមរដ្ឋមន្រ្តីអំពី កង្វះមន្ត្រីក្របខ័ណ្ឌគ្រូបង្រៀនគ្រប់កម្រិត បានក្លាយជាបញ្ហាប្រឈម ជាប្រចាំសម្រាប់វិស័យពុទ្ធិកសិក្សា។

ឯកឧត្តម ចាយ បូរិន មានប្រសាសន៍ថា ការជួបសំណេះសំណាលនាឱកាសនេះ ក្នុងគោលបំណងដើម្បីឈ្វេងយល់នូវសកម្មភាពការងាររបស់មន្រ្តីរាជការនៃមន្ទីរធម្មការនិងសាសនា ស្តាប់ពីបញ្ហាប្រឈមចំនួនៗ និងសំនូមពរជាក់ស្តែងដែលជាតម្រូវការរបស់មន្ទីរខេត្តនីមួយៗ។

ឯកឧត្តម ចាយ បូរិន បានគូសបញ្ជាក់ថា កម្ពុជាមានសិទ្ធសេរីភាពពេញលេញ និងសុខដុមនីយកម្មខាងជំនឿសាសនា ដោយស្ថិតក្រោមច្បាប់របស់រាជរដ្ឋាភិបាលកម្ពុជា ដែលមានក្រសួងធម្មការនិងសាសនាជាសេនាធិការ គ្រប់គ្រង និងយកចិត្តទុកដាក់លើបង្រួបបង្រួមគ្រប់សាសនាទាំងអស់នៅកម្ពុជា ឲ្យមានសុខដុមនីយកម្មសាសនា ។

ដោយឡែកខេត្តសៀមរាប ជាខេត្តទេសចរណ៍ដ៏មានសក្តានុពល ដែលបង្ហាញអរិយធម៌ វប្បធម៌ និងសាសនា ដូចនេះមន្ទីរធម្មការនិងសាសនាខេត្តត្រូវយកចិត្តទុក្ខដាក់លើមន្ត្រីខ្លួន ដាច់ខាតត្រូវមាន ចំណេះ ជំនាញ និងវិជ្ជាជីវៈច្បាស់លាស់ សិក្សាឲ្យច្បាស់នូវសាសនាទាំងអស់ក្នុងខេត្ត ហើយអភិរក្សទេសចរណ៍សាសនាឲ្យល្អប្រសើរ សម្រាប់ចូលរួមអភិវឌ្ឍន៍ជាមួយរាជរដ្ឋាភិបាលយើងឲ្យកាន់តែរីកចម្រើនបន្ថែមបន្តទៀត៕