ឯកឧត្តម មាន ចាន់យ៉ាដា អំពាវនាវដល់បងប្អូនទាំងអស់គ្នា ត្រូវបង្កើនទំនាក់ទំនងកាន់តែស្និតស្នាលរវាងមន្ត្រី និងពលរដ្ឋ

ភ្នំពេញ៖ ឯកឧត្តម មាន ចាន់យ៉ាដា អភិបាល នៃគណៈអភិបាលខេត្តឧត្តរមានជ័យ បានអំពាវនាវដល់បងប្អូនទាំងអស់គ្នា ត្រូវរក្សានូវវប្បធម៌ នៃការជួយគ្នាទៅវិញទៅមក បង្កើនទំនាក់ទំនងកាន់តែស្និតស្នាលរវាងមន្ត្រី និងប្រជាពលរដ្ឋ។

ឯកឧត្តមអភិបាលខេត្ត បានអំពាវនាវបែបនេះ ធ្វើឡើងក្នុងពិធីវេទិកាសាធារណៈ សង្កាត់សំរោង របស់ក្រុមការងាររាជរដ្ឋាភិបាលចុះជួយមូលដ្ឋានក្រុងសំរោង នៅព្រឹកថ្ងៃទី១៩ ខែកក្កដា ឆ្នាំ២០២៤។

ក្នុងឱកាសនោះ ឯកឧត្តម មាន ចាន់យ៉ាដា អភិបាលខេត្ត បានថ្លែងថា ឯកឧត្តមពិតជាមានសេចក្តីសោមនស្សរីករាយយ៉ាងក្រៃលែងដែលបានជួបជាមួយបងប្អូនអ្នកក្រុងសំរោង ខេត្តឧត្តរមានជ័យ ក្នុងវេទិកាសាធារណៈរបស់ក្រុមការងាររាជរដ្ឋាភិបាលចុះមូលដ្ឋានខេត្ត ហើយបងប្អូនបានបង្ហាញនូវភាពស្និតស្នាល និងក្លាហានក្នុងការលើកឡើងនូវតម្រូវការរបស់ខ្លួន ដើម្បីដោះស្រាយរួមគ្នាជាមួយរដ្ឋបាលខេត្តឧត្តរមានជ័យ និងរដ្ឋបាលក្រុងសំរោង។

ជាមួយគ្នានោះ ឯកឧត្តមអភិបាលខេត្ត បានបញ្ជាក់ថា ត្បិតយើងជួបគ្នាលើកដំបូង ប៉ុន្តែបងប្អូនអ្នកក្រុងសំរោងពិតជាផ្តល់នូវភាពស្និតស្នាលដល់រូបឯកឧត្តមយ៉ាងក្រៃលែង ៕