ឯកឧត្តម សុខ ពុទ្ធិវុធ៖ សម្តេចធិបតី និងលោកជំទាវបណ្ឌិត តែងតែស្វែងរកកិច្ចសហការពីបណ្តាស្ថាប័ននានា ដើម្បីទទួលបានឱកាសអាហារូបករណ៍ និងការងារបន្ថែមសម្រាប់សិស្ស-និស្សិតកម្ពុជា
ភ្នំពេញ៖ នារសៀលថ្ងៃទី១៩ ខែកក្កដា ឆ្នាំ២០២៤ ឯកឧត្តម សុខ ពុទ្ធិវុធ អនុប្រធាន តំណាងដ៏ខ្ពង់ខ្ពស់ លោកជំទាវបណ្ឌិត ពេជ ចន្ទមុន្នី ប្រធានសមាគមសិស្ស-និស្សិតអាហារូករណ៍ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត (អ.ម.ត) បានអញ្ជើញជាអធិបតីភាពក្នុងជំនួបសម្តែងការគួរសមជាមួយ Mr. Askhat Azhikhanov នាយកប្រតិបត្តិធនាគារវឌ្ឍនៈ អាស៊ី ចំកាត់ (ធនាគារ ABA) និងសហការី នៅស្នាក់ការកណ្តាលធនាគារ ABA។
ថ្លែងក្នុងជំនួបនេះ ឯកឧត្តមអនុប្រធាន បានពាំនាំការផ្តាំផ្ញើសាកសួរសុខទុក្ខ និងថ្លែងអរគុណពីសំណាក់ សម្តេចធិបតី ហ៊ុន ម៉ាណែត ប្រធានកិត្តិយស និងលោកជំទាវបណ្ឌិត ពេជ ចន្ទមុន្នី ប្រធានសមាគម អ.ម.ត ចំពោះគណៈគ្រប់គ្រងធនាគារ ABA។
បន្ថែមពីនោះ ឯកឧត្តម សុខ ពុទ្ធិវុធ បានសង្ងត់ថា លោកទាំងពីរ តែងតែស្វែងរកកិច្ចសហការពីបណ្តាក្រសួង ស្ថាប័ន អង្គការ សមាគម ធនាគារ ក្រុមហ៊ុននានា ដើម្បីទទួលបានឱកាសអាហារូបករណ៍ និងការងារបន្ថែមសម្រាប់សិស្ស-និស្សិតកម្ពុជា ។
ជាការឆ្លើយតបទៅនឹងការណ៍នេះ, សម្រាប់ឆ្នាំ២០២៤ គឺជាលើកទី៣ ហើយដែលធនាគារ ABA បានចូលរួមជាមួយសមាគម អ.ម.ត តាមរយៈការឧបត្ថម្ភថវិកាចំនួន ១០ ម៉ឺនដុល្លារ ក្នុង ១ឆ្នាំ សម្រាប់រយៈពេល ៤ ឆ្នាំ ដែលនេះបង្ហាញពីឆន្ទៈចូលរួមជាមួយសមាគម អ.ម.ត ក្នុងការពង្រឹង និងកសាងសមត្ថភាពសិស្ស-និស្សិត ឱ្យទទួលបានជំនាញមួយយ៉ាងច្បាស់លាស់ សំដៅរួមចំណែកដល់ការកសាងមូលធនមនុស្សនៅកម្ពុជា ៕
