រដ្ឋមន្ត្រីក្រសួងអធិការកិច្ច អនុញ្ញាតឱ្យ ប្រធាននាយកប្រតិបត្តិធនាគារពាណិជ្ជ ឈីហ្វ (ខេមបូឌា) ម.ក ចូលជួបសម្តែងការគួរសម និងពិភាក្សាការងារ

ភ្នំពេញ៖ នៅរសៀលថ្ងៃសុក្រ ១៤កើត ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៩ ខែកក្កដា ឆ្នាំ២០២៤ ឯកឧត្តម ហួត ហាក់ រដ្ឋមន្ត្រីក្រសួងអធិការកិច្ច បានអនុញ្ញាតឱ្យលោក សឿង ម៉ូរ៉ារិទ្ធ នាយកប្រតិបត្តិធនាគារពាណិជ្ជ ឈីហ្វ (ខេមបូឌា) ម.ក (Chief Cambodia Commercial Bank Plc.) និងសហការី ចូលជួបសម្តែងការគួរសម និងពិភាក្សាការងារ នៅទីស្តីការក្រសួងអធិការកិច្ច។

ជាកិច្ចចាប់ផ្តើម ឯកឧត្តមរដ្ឋមន្ត្រី បានសម្តែងក្ដីសោមនស្សរីករាយស្វាគមន៍លោក សឿង ម៉ូរ៉ារិទ្ធ នាយកប្រតិបត្តិធនាគារពាណិជ្ជ ឈីហ្វ (ខេមបូឌា) ម.ក (Chief Cambodia Commercial Bank Plc.) និងសហការី មកកាន់ទីស្ដីការក្រសួង ដើម្បីជួបពិភាក្សាការងារនាថ្ងៃនេះ និងថ្លែងអំណរគុណចំពោះការវិនិយោគក្នុងវិស័យធនាគារដែលបានចូលរួមចំណែកក្នុងការជួយអភិវឌ្ឍវិស័យហិរញ្ញវត្ថុ ក៏ដូចជាផ្តល់ការងារជូនប្រជាពលរដ្ឋនៅក្នុងព្រះរាជាណាចក្រកម្ពុជា។

ជាការឆ្លើយតប លោកនាយកប្រតិបត្តិ បានគោរពថ្លែងអំណរគុណយ៉ាងជ្រាលជ្រៅជូនចំពោះ ឯកឧត្តមរដ្ឋមន្ត្រី ដែលបានឆ្លៀតពេលវេលាដ៏មមាញឹកអនុញ្ញាតដល់រូបលោក និងសហការី បានចូលជួបសម្តែងការគួរសម និងពិភាក្សាការងារ ព្រមទាំងបានជម្រាបជូនអំពីសាវតារបស់ធនាគារពាណិជ្ជ ឈីហ្វ (ខេមបូឌា) ម.ក ដែលបានបង្កើតឡើងនៅថ្ងៃទី៥ ខែធ្នូ ឆ្នាំ២០១៣ ជាធនាគារឯកទេស ត្រូវបានកាន់កាប់ទាំងស្រុងដោយក្រុមហ៊ុន Chief Financial Group (Cambodia) Limited (ចុះបញ្ជីនៅ British Virgin Island) និងជាបុត្រសម្ព័ន្ធនៃក្រុមហ៊ុន Chief Group ដែលបង្កើតឡើងតាំងពីឆ្នាំ១៩៧៩ នៅទីក្រុងហុងកុង។ ដោយកាលពីថ្ងៃទី៩ ខែធ្នូ ឆ្នាំ២០២៣ កន្លងទៅ ធនាគារបានរៀបចំខួបលើកទី១០ ព្រមទាំងបានដាក់សម្ពោធនូវ Logo ថ្មី របស់ខ្លួនជាផ្លូវការ និងនៅថ្ងៃទី៦ ខែមិថុនា ឆ្នាំ២០១៨ បានទទួលអាជ្ញាបណ្ណពីធនាគារជាតិនៃកម្ពុជា ជាធនាគារពាណិជ្ជ និងបានរៀបចំពិធីសម្ពោធផ្លូវការកាលពីថ្ងៃទី២២ ខែកក្កដា ឆ្នាំ២០១៨ នៅសណ្ឋាគារ Sofitel Phnom Penh Phokeethra។ ជាមួយគ្នានេះ ធនាគារពាណិជ្ជ ឈីហ្វ (ខេមបូឌា) ម.ក មានបុគ្គលិកចំនួន ១៨០នាក់ ដោយគិតត្រឹមចុងឆ្នាំ២០២៣ ធនាគារទទួលបានប្រាក់បញ្ញើជាង ១៦០ លានដុល្លារអាមេរិក និងមានទ្រព្យសកម្មជាង ២៤០លានដុល្លារអាមេរិក ហើយធនាគារអាចផ្ដល់កម្ចីតាមអនឡាញដោយគ្មានទ្រព្យធានាបានរហូតដល់ ៥.០០០ដុល្លារអាមេរិក។

ថ្លែងក្នុងឱកាសនេះ ឯកឧត្តមរដ្ឋមន្ត្រី បានកោតសរសើរ និងវាយតម្លៃខ្ពស់ចំពោះការងារសប្បុរសធម៌របស់ធនាគារកន្លងមក ហើយបានសង្ឃឹមជឿជាក់ថាធនាគារ នឹងអាចចូលរួមជាមួយក្រសួងអធិការកិច្ចលើសកម្មភាពមនុស្សធម៌របស់ក្រសួង។

ឯកឧត្តមរដ្ឋមន្ត្រី ក៏បានបញ្ជាក់អំពីជំហររបស់ក្រសួងក្នុងការជួយគាំទ្រ និងដោះស្រាយបញ្ហាប្រឈម ការលំបាករបស់ធនាគារ និងជួយសម្របសម្រួលជាមួយនឹងស្ថាប័នដែលពាក់ព័ន្ធ ដោយឈរលើមូលដ្ឋានច្បាប់ ដើម្បីផ្តល់ទំនុកចិត្ត និងការការពារជូនដល់អ្នកវិនិយោគ។

ជាទីបញ្ចប់ ឯកឧត្តមរដ្ឋមន្ត្រី បានថ្លែងអំណរគុណចំពោះការមកជួបសម្ដែងការគួរសម និងជំនឿទុកចិត្តក្នុងការបោះទុនវិនិយោគនៅប្រទេសកម្ពុជា ព្រមទាំងជូនពរ លោកនាយកប្រតិបត្តិ និងសហការី ព្រមទាំងថ្នាក់ដឹកនាំ និងបុគ្គលិករបស់ធនាគារទាំងអស់ មានសុខភាពល្អ ជោគជ័យបន្តទៀតលើអាជីវកម្ម និងអាចឈានដល់ការពង្រីកអាជីវកម្មបន្ថែមទៀត ដែលជាការចូលរួមចំណែកជាមួយរាជរដ្ឋាភិបាល ក្នុងការអភិវឌ្ឍវិស័យហិរញ្ញវត្ថុនៅប្រទេសកម្ពុជាឱ្យកាន់តែរីកចម្រើន និងផ្តល់លក្ខណៈងាយស្រួលដល់ប្រជាពលរដ្ឋកម្ពុជា អាចទទួលបាននូវប្រាក់កម្ចីតាមប្រព័ន្ធស្របច្បាប់ ជាមួយនឹងអត្រាការប្រាក់មានលក្ខណៈទាក់ទាញ និងប្រកួតប្រជែង ព្រមទាំងផ្តល់ឱកាសការងារដល់ប្រជាពលរដ្ឋកម្ពុជាផងដែរ ៕