ឯកឧត្តមរដ្ឋមន្រ្តី ថោ ជេដ្ឋា អញ្ជើញចុះស្វែងយល់ពីការអាស្រ័យផលលើដីព្រៃលិចទឹកតំបន់២ និងតំបន់៣ នៃបឹងទន្លេសាប ក្នុងភូមិសាស្រ្តខេត្តកំពង់ឆ្នាំង

ភ្នំពេញ៖ នៅព្រឹកថ្ងៃអាទិត្យ ១រោច ខែអាសាឍ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២១ ខែកក្កដា ឆ្នាំ២០២៤ ឯកឧត្តម ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប បានអញ្ជើញចុះស្វែងយល់ពីការអាស្រ័យផលលើដីព្រៃលិចទឹក និងពិនិត្យស្ថានភាពទីតាំងជាក់ស្តែងដីព្រៃលិចទឹកតំបន់២ និងតំបន់៣ ដែលបានកាត់ឆ្វៀលជូនប្រជាពលរដ្ឋ ស្ថិតនៅក្នុងភូមិសាស្ត្រឃុំសំរោងសែន និងឃុំច្រណូក ស្រុកកំពង់លែង ខេត្តកំពង់ឆ្នាំង។

សូមជម្រាបថា ការចុះសិក្សាស្វែងយល់នាពេលនេះមានការចូលរួមអមដំណើរពីឯកឧត្តម រដ្ឋលេខាធិការ អនុរដ្ឋលេខាធិការ អនុប្រធានអាជ្ញាធរទន្លេសាប អគ្គនាយក អគ្គលេខាធិការ លោក លោកស្រី អគ្គនាយករង ប្រធាននាយកដ្ឋាន និងមន្ត្រីជំនាញ ព្រមទាំងមានការចូលរួមពីលោកអភិបាលរងនៃគណៈអភិបាលខេត្តកំពង់ឆ្នាំង និងប្រធានមន្ទីរពាក់ព័ន្ធជុំវិញខេត្តជាច្រើនរូបផងដែរ។

ក្នុងឱកាសចុះសិក្សាស្វែងយល់នេះដែរ ឯកឧត្តមរដ្ឋមន្ត្រី និងគណៈប្រតិភូ បានជួបពិភាក្សាការងារជាមួយអាជ្ញាធរដែនដីក្នុងមូលដ្ឋានភូមិឃុំស្រុកខេត្ត ដើម្បីស្វែងយល់បន្ថែមពីសារបាន ពីការអាស្រ័យផលរបស់ប្រជាពលដ្ឋទាំងពីរឃុំ និងការតវ៉ារបស់ពួកគាត់ទៅកាន់ក្រសួងរៀបចំដែនដី នគរូបនីយកម្ម និងសំណង់។

សូមបញ្ជាក់ថា បឹងទន្លេសាបត្រូវបានបែងចែកជា បីតំបន់គឺ តំបន់១ ជាតំបន់ភូមិដ្ឋានរបស់ប្រជាពលរដ្ឋអាចចុះបញ្ជីដីធ្លី និងផ្តល់កម្មសិទ្ធិជូនប្រជាពលរដ្ឋបាន ហើយតំបន់២ ជាតំបន់ទ្រនាប់ដែលស្ថិតនៅចន្លោះរវាងតំបន់១ និងតំបន់៣ ដែលតំបន់នេះអាចអនុញ្ញាតផ្តល់សិទ្ធិប្រើប្រាស់ និងអាស្រ័យផលជូនប្រជាពលរដ្ឋបាន និងតំបន់៣ ជាតំបន់ព្រៃលិចទឹក និងជាតំបន់ហាមឃាត់ប៉ះពាល់ដាច់ខាត។ ខេត្តចំនួន៦ ដែលស្ថិតនៅជាប់បឹងទន្លេសាបរួមមាន ខេត្តកំពង់ឆ្នាំង ខេត្តពោធិ៍សាត់ ខេត្តបាត់ដំបង ខេត្តបន្ទាយមានជ័យ ខេត្តសៀមរាប និងខេត្តកំពង់ធំ។ បឹងទន្លេសាបសម្បូរទៅដោយប្រព័ន្ធអេកូឡូស៊ី និងជីវចម្រុះ ដែលត្រូវថែរក្សាការពារឱ្យបានគង់វង្ស ដែលជាសម្បត្តិមហាសាលសម្រាប់មនុស្សជាតិ ជាពិសេសដែនព្រៃលិចទឹកនិងព្រៃលិចទឹកតំបន់៣ ជុំវិញបឹងទន្លេសាប ៕