ឧត្តមសេនីយ៍ឯក ជីវ ផល្លី អញ្ជើញបើកវគ្គបណ្តុះបណ្តាល ស្តីពីនីតិវិធីស៊ើបអង្កេតករណីជួញដូរមនុស្សគ្រប់ទម្រង់ និងការកំណត់អត្តសញ្ញាណជនរងគ្រោះ ដល់ថ្នាក់ដឹកនាំនាយកដ្ឋានប្រឆាំងការជួញដូរមនុស្សនិងការពារអនីតិជន
ភំ្នពេញ៖ នៅអគ្គស្នងការដ្ឋាននគរបាលជាតិ ព្រឹកថ្ងៃទី២៣ ខែកក្កដា ឆ្នាំ២០២៤ ឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ តំណាងដ៏ខ្ពង់ខ្ពង់ ឯកឧត្តម នាយឧត្តមសេនីយ៍ អគ្គស្នងការនគរបាលជាតិ
អញ្ជើញជាអធិបតី ក្នុងពិធីបើកវគ្គបណ្តុះបណ្តាលស្តីពីនីតិវិធីស៊ើបអង្កេតករណីជួញដូរមនុស្សគ្រប់ទម្រង់ និងការកំណត់អត្តសញ្ញាណជនរងគ្រោះ ដល់ថ្នាក់ដឹកនាំ នៃនាយកដ្ឋានប្រឆាំងការជួញដូរមនុស្សនិងការពារអនីតិជន ដោយមានការចូលរួមពី លោក ឌី នឿត នាយកប្រចាំប្រទេស អង្គការម៉ារីស៊ី (MARICI)។
ជាកិច្ចចាប់ផ្តើម លោកឧត្តមសេនីយ៍ទោ សុក សំបូរ ប្រធាននាយកដ្ឋានប្រឆាំងការជួញដូរមនុស្សនិងការពារអនីតិជន មានប្រសាសន៍ថា ដោយមានកិច្ចសហការនិងគាំទ្រពី លោក ឌី នឿត នាយកប្រចាំប្រទេស អង្គការម៉ារីស៊ី (MARICI) នាយកដ្ឋានប្រឆាំងការជួញដូរមនុស្សនិងការពារអនីតិជន បានរៀបចំវគ្គបណ្តុះបណ្តាល ស្តីពីនីតិវិធីស៊ើបអង្កេតករណីជួញដូរមនុស្សគ្រប់ទម្រង់ និងការកំណត់អត្តសញ្ញាណជនរងគ្រោះ ដល់ថ្នាក់ដឹកនាំនាយកដ្ឋានប្រឆាំងការជួញដូរមនុស្សនិងការពារអនីតិជន នៅពេលនេះ ។
លោក ឌី នឿត នាយកប្រចាំប្រទេស អង្គការម៉ារីស៊ី (MARICI) មានសេចក្តីសោមនស្សរីករាយ ដែលបានចូលរួមជាគ្រូបង្គោលក្នុងវគ្គបណ្តុះបណ្តាលនាពេលនេះ ។ លោកបន្តថា
គោលបំណងនៃការបណ្តុះបណ្តាលនាពេលនេះ គឺចង់ឲ្យមន្រ្តីអនុវត្តច្បាប់មានចំណេះជំនាញ ព្រមទាំងបច្ចេកទេស។
ឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ ក្នុងនាម ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ក្រសួងមហាផ្ទៃ សូមថ្លែងអំណរគុណយ៉ាងជ្រាលជ្រៅដល់ លោក ឌី នឿត នាយកប្រចាំប្រទេស អង្គការម៉ារីស៊ី (MARICI) ដែលបានផ្តល់នូវកិច្ចសហការក្នុងការបើកវគ្គបណ្តុះបណ្តាល ។ ឯកឧត្តមអគ្គស្នងការរងបន្តថា គោលបំណង នៃការបើកវគ្គបណ្តុះបណ្តាលនេះ គឺដើម្បីពង្រឹងសមត្ថភាព បង្កើនចំណេះដឹងនិងជំនាញ និងដើម្បីចូលរួមប្រយុទ្ធប្រឆាំងអំពើជួញដូរមនុស្សគ្រប់ទម្រង់ ដល់ថ្នាក់ដឹកនាំនាយកដ្ឋានប្រឆាំងការជួញដូរមនុស្សនិងការពារអនីតិជន។
ឯកឧត្តម ឧត្តមសេនីយ៍ឯក អគ្គស្នងការរង បានបន្តថា វគ្គបណ្តុះបណ្តាលនេះទៀតសោធន៍ មាន២មេរៀន ទី១-គឺនីតិវិធីស៊ើបអង្កេតករណីជួញដូរមនុ្សគ្រប់ទម្រង់ និងទី២-គឺការយល់ដឹងពីតំហែទាំការប៉ះទង្គិចផ្លូវចិត្ត។
ឯកឧត្តម ឧត្តមសេនីយ៍ឯក បានបន្តទៀតថា ការយល់ដឹងពីតំហែទាំការប៉ះទង្គិចផ្លូវចិត្ត គឺសំខាន់ខ្លាំងណាស់សម្រាប់មន្រ្តីអនុវត្តច្បាប់ ព្រោះមន្រ្តីអនុវត្តច្បាប់ ងាយនឹងប៉ះទង្គិចផ្លូវចិត្តណាស់ ក្នុងការស៊ើបអង្កេតអំពើជួញដូរមនុស្សគ្រប់ទម្រង់។
ឯកឧត្តម ឧត្តមសេនីយ៍ឯក ជីវ ផល្លី ក៏បានថ្លែងអំណរគុណដល់ លោក ឌី នឿត នាយកប្រចាំប្រទេស អង្គការម៉ារីស៊ី (MARICI) ដែលបានចែករំលែកមេរៀនអំពីការប៉ះទង្គិចផ្លូវចិត្តនាពេលនេះ។
ឯកឧត្តម ឧត្តមសេនីយ៍ឯក អគ្គស្នងការរង សង្ឃឹមថា សិក្ខាកាមទាំងអស់ អាចចូលរួមជាយោបល់ និងមានសំណួរឲ្យបានច្រើនដើម្បីជាការយល់ដឹងកាន់តែច្បាស់ទាំងអស់គ្នាសម្រាប់ការកំណត់អត្តសញ្ញាណជនរងគ្រោះ។
សូមជម្រាបថា វគ្គបណ្តុះបណ្តាល ស្តីពី នីតិវិធីស៊ើបអង្កេតករណីជួញដូរមនុស្សគ្រប់ទម្រង់ និងការកំណត់អត្តសញ្ញាណជនរងគ្រោះនេះ មានរយៈពេល២ថ្ងៃ គឺថ្ងៃទី២៣ដល់ថ្ងៃទី២៤ ខែកក្កដា ឆ្នាំ២០២៤ ដែលសិក្ខាកាមជា ថ្នាក់ដឹកនាំ នៃនាយកដ្ឋានប្រឆាំងការជួញដូរមនុស្សនិងការពារអនីតិជន ៕
