ឯកឧត្តម ម៉េង ហុង ជួបសំណេះសំណាលជាមួយបេក្ខជន បេក្ខនារី ដែលបានប្រឡងជាប់ជាស្ថាពរមកបម្រើការងារក្នុងបេឡាជាតិសន្ដិសុខសង្គមនៃក្រសួងការងារ
ភ្នំពេញ៖ នាព្រឹកថ្ងៃទី២៤ ខែកក្កដា ឆ្នាំ២០២៤នេះ ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញជួបសំណេះសំណាល និងប្រកាសទទួលស្គាល់ ជាផ្លូវការ បេក្ខជន-បេក្ខនារី ដែលបានប្រឡងជាប់ជាស្ថាពរមកបម្រើការងារក្នុងបេឡាជាតិសន្ដិសុខសង្គម សម្រាប់ឆ្នាំ២០២៤ នៅស្នាក់ការកណ្ដាល ប.ស.ស. រាជធានីភ្នំពេញ និងតាមបណ្ដាសាខាខេត្ត សរុបចំនួន ២៣៣រូប ដោយផ្ទាល់ និងតាមរយៈប្រព័ន្ធអនឡាញ។
ក្នុងឱកាសសំណេះសំណាលនេះ ឯកឧត្តមប្រតិភូរាជរដ្ឋាភិបាល បានណែនាំដល់បេក្ខជន បេក្ខនារី ត្រូវយកចិត្តទុកដាក់រៀនសូត្រអំពីលិខិតបទដ្ឋានពាក់ព័ន្ធនឹង ប.ស.ស. គោរពវិន័យការងារ តាមបទបញ្ជាផ្ទៃក្នុង ប.ស.ស. ជាពិសេសត្រូវមានសាមគ្គីភាពផ្ទៃក្នុង និងសហការបំពេញការងារជាក្រុម ដើម្បីអនុវត្តការងារប្រចាំថ្ងៃ ក្នុងការបម្រើសេវាជូនប្រជាពលរដ្ឋស្របតាមចក្ខុវិស័យ និងបេសកកម្ម របស់ ប.ស.ស. ឱ្យបានកាន់តែរីកចម្រើន ដើម្បីជាប្រយោជន៍របស់បងប្អូនប្រជាពលរដ្ឋ។
ឯកឧត្តមប្រតិភូរាជរដ្ឋាភិបាលបានបន្ដថា នៅពេលដែលក្លាយជាបុគ្គលិករបស់បេឡាជាតិសន្ដិសុខសង្គម បេក្ខជន បេក្ខនារី ទាំងអស់ ត្រូវខិតខំអភិវឌ្ឍន៍សមត្ថភាពជាប្រចាំ ដើម្បីបង្កើនចំណេះដឹងខ្លួនសម្រាប់ជាថ្នាលបោះជំហានទៅមុខ ក៏ដូចជាសម្រាប់សម្រេចគោលដៅរួមរបស់អង្គភាពទាំងមូលផងដែរ៕
